Япония бош вазири Санаэ Такаити раҳбарлигида ҳукумат аҳолининг камайишига қарши курашиш стратегиясини ишлаб чиқиш учун штаб тузди, деб хабар бермоқда “Kyodo” ахборот агентлиги.

Таъкидланишича, мазкур штаб туғилиш даражасини ошириш ва оилаларни қўллаб-қувватлашдан тортиб, минтақавий ривожланишни рағбатлантиришгача бўлган демографик чора-тадбирларни амалга оширишни мувофиқлаштириши кутилмоқда. 

Ҳозирда бу масъулият бир нечта агентликлар, жумладан, Болалар ва оила ишлари агентлиги ва Вазирлар Маҳкамаси ўртасида тақсимланган.

Бундан ташқари, ўлка бош вазири ҳукуматга туғилиш даражасини ошириш бўйича қўшимча чораларни ишлаб чиқишни тезлаштиришни буюрган.

Аҳолининг тобора кексайиб бораётгани ва туғилиш даражасининг пастлиги кунчиқар мамлакат дуч келаётган энг долзарб ижтимоий муаммолар қаторига киради. Масалан, 65 ёшдан ошган японларнинг улуши умумий аҳолининг рекорд даражадаги 29,4 фоизини ташкил этади, бу дунёдаги энг юқори кўрсаткичдир. 

С.Раҳимов, ЎзА