Япония ҳукумати чет элликлар учун фуқаролик олиш талабларини жиддий мураккаблаштиришни режалаштирмоқда. The Independent хабар беришича, янги қоидаларга кўра, доимий истиқомат муддати 5 йилдан 10 йилга оширилади ва япон тилини билиш мажбурий қилинади.

Ислоҳот Ниппон Ишин партияси стандартларни юмшоқ деб танқид қилганидан сўнг бошланди. Либерал-демократик партиянинг таклифига кўра, фуқаролик учун қуйидагилар талаб қилинади: 10 йиллик доимий истиқомат, намунавий хулқ-атвор, 18 ёшдан катталик ва барқарор даромад манбаи. Давлат органлари якуний қарорда кенг ваколатга эга бўлади. Ислоҳотлар келаси йилдан кучга кириши кутилмоқда.

Ниппон Ишин партияси хорижликлар сонига чеклов қўйиш ва натурализация қилинган шахсларни фуқароликдан маҳрум қилиш механизмини ҳам таклиф қилмоқда. Ўта ўнгчи Сансеито партияси эса чет элликларни қонунчилик органларига номзод сифатида кўрсатмаслик тарафдори.

Шунга қарамай, айрим истиснолар ҳам назарда тутилмоқда. Масалан, Японияда мусобақаларда иштирок этган спортчилар 10 йиллик муддатни тўлиқ ўтмасдан ҳам фуқаролик олиши мумкин. Доимий резидентлар учун япон тили ва фуқаролик таълими бўйича имтиҳонлар мажбурий этилади.

Японияда хорижликлар сони 2015 йилда 2,23 миллиондан 2025 йил июнгача 3,95 миллионга етиб, аҳолининг тахминан 3 фоизини ташкил қилмоқда. Танқидчилар фикрича, ишчи кучи етишмовчилиги авжлаган бир пайтда бундай консерватив қоидалар миграция йўлида янги тўсиқлар яратади.

<iframe width="560" height="315" src="https://www.youtube.com/embed/UpjhsCqg39w?si=WmbRILMkD18G4KJP" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Мадинабону Насриева, Анвархўжа Аҳмедов, ЎзА