Сирдарё вилояти ҳокими Акмалжон Маҳмудалиев вилоят божхона бошқармаси раҳбарлари, вилоят идора ва ташкилотлари вакилларидан иборат ишчи гуруҳ иштирокида Янгиер шаҳрида барпо этилаётган ун ва қандолатчилик маҳсулотлари ҳамда мева- сабзавотларни қайта ишлаш лойиҳалари билан танишди.

Қиймати 580 минг АҚШ долларига тенг бўлган лойиҳа бўйича йилига 1,8 минг тонна қандолатчилик ва мева- сабзавот маҳсулотларини қайта ишлаб чиқаришга эришилиб, 60 нафар янги иш ўрни яратилади.

Лойиҳа тўлиқ ишга тушиши натижасида ун, макарон, қандолат маҳсулотлари, конфетлар, жем ва пюре, мева данакларидан ўсимлик ёғи, мева-сабзавотлардан консерва маҳсулотлари ва хўжалик совуни ишлаб чиқарилади.

Бугунги кунда мазкур лойиҳа доирасида мавжуд асбоб-ускуналарни ўрнатиш ишлари бошланган бўлиб, жорий йилнинг 2-чорагида лойиҳа бўйича ишлаб чиқариш тўлиқ ишга туширилиши режалаштирилган.

Ш.Суяров,  

ЎзА мухбири