Бу ҳақида шаҳар ҳокимлиги ахборот хизмати маълум қилди. Хабарда қайд этилишича, жамоат жойларида, ташкил этилган блок постларда шаҳар Санитария-эпидемиологик осойишталик маркази томонидан коронавирус инфекцияси аломатларини аниқлаш бўйича мажбурий тиббий назорат ўрнатилган. 

«Бугундан бошлаб мунтазам равишда шаҳар Санитария-эпидемиологик осойишталик маркази ва мудофаа ишлари бўлими томонидан шаҳар марказида жойлашган деҳқон бозори, савдо мажмуалари (супермаркет, гипермаркет ва бошқалар) тепловизорлар ва антисептик воситалар билан жиҳозланди ва кучайтирилган тартибда дезинфекция ишлари амалга оширилмоқда», дейилади хабарда. Ҳудуддаги буюм бозорлари фаолиятига рухсат этилмайди.

Эслатиб ўтамиз, 2020 йил июнь ойида Наврўзобод МФЙда истиқомат қилувчи 4 нафар фуқарода коронавирус инфекцияси аниқланган. Шаҳарга эпидемиологик нохуш ҳудудлардан кириб келган фуқаролар ҳамда беморлар билан мулоқотда бўлган 525 та оила (1994 та фуқаро) тиббий кузатувга олинган. Шундан 45 та фуқаро шифохонада, уй кузатувда 480 та оила (1949 та фуқаро)ни ташкил этади.

Мавжуд эпидемиологик вазиятдан келиб чиққан ҳолда жорий йил 13 июнь ҳолатига Санитария-эпидемиологик осойишталик агентлиги томонидан Янгиер шаҳри «қизил» тоифадаги ҳудудга ажратилган эди. Бугунги кунда инфекцияси аниқланган 4 нафар фуқаро тўлиқ соғайиб ўз уйларига қайтарилган. Тиббий кузатувдагиларни 511 нафари соғломлаштиришга эришилди, Коронавирус инфекциясининг тарқалиши билан боғлиқ эпидемиологик вазиятдан келиб чиққан ҳолда 2020 йил 20 июнь ҳолатига Янгиер шаҳри «яшил» тоифадаги ҳудудга айлантирилганди. 

Сирдарё вилоят санитария-эпидемиологик осойишталик маркази Жамоатчилик билан ишлаш бўлими хабарига кўра бугунги кунда, вилоятдаги Ховос ва Боёвут туманлари «сариқ» ҳудуд, Гулистон шаҳри сўнгги кунларда аҳоли орасида коронавирус инфекцияси билан касалланишлар ҳолати кўпайганлиги учун «қизил» ҳудуд тоифасига киритилган.