Республика ихтисослаштирилган она ва бола саломатлиги илмий-амалий тиббиёт маркази Самарқанд вилоят филиалига кўз касалликлари билан боғлиқ ногиронликнинг олдини олишга ёрдам берувчи педиатрик неонатал ретинал камера келтирилди.

Қиймати 1 миллиард 500 миллион сўм бўлган мазкур тиббий ускуна Ўзбекистон “Меҳр-шафқат ва саломатлик” жамоат фонди давлат ижтимоий буюртмаси шаклидаги “Эрта туғилган чақалоқларни ретинополиядан ҳимоя қилиш” лойиҳаси доирасида муассасага тақдим этилди.  

– Бу аппарат эрта туғилган чақалоқларда учрайдиган ретинопатия, яъни кўз тўр касалликларининг олдини олишда жуда муҳим, – дейди Республика ихтисослаштирилган она ва бола саломатлиги илмий-амалий тиббиёт маркази Самарқанд вилоят филиали бош врачи Лола Ҳамроева.

[gallery-27219]

– Чала туғилган болалар ретинопатияси – бу кўз тўр пардасининг вазопролифератив шикастланиши бўлиб, фақатгина муддатидан эрта туғилган болаларда учрайди. Касаллик натижасида кўз тўр пардаси, шишасимон тана ва баъзан гавҳарда ўзгаришлар кузатилади. Ўз вақтида даволанмаса, кўз ичида чандиқлар ривожланиши ва тўр парда кўчиши сабабли кўрликка сабаб бўлиши мумкин. Ўтган йили чала туғилган 800 нафарга яқин чақалоқни тиббий кўрикдан ўтказганимизда 90  нафарга яқинида кўз пардасининг шикастланиши хасталиги аниқланган. Шу пайтгача ушбу ташхис билан туғилган болаларни даволашда анча эски ускуна билан ишлашимизга тўғри келар, кўпчиликни пойтахтга жўнатишга мажбур бўлар эдик.

Эндиликда ушбу замонавий жиҳоз ёрдамида касалликни эрта аниқлаш ва даволаш имконияти пайдо бўлди.

Олий Мажлис ҳузуридаги Фуқаролик жамияти институтларини қўллаб-қувватлаш жамоат фонди томонидан молиялаштирилган мазкур лойиҳа доирасида Республика ихтисослаштирилган она ва бола саломатлиги илмий-амалий тиббиёт маркази ҳамда унинг Хоразм, Навоий, Самарқанд ва Фарғона вилоятларидаги филиалларини педиатрик неонатал ретинал камера билан таъминлаш кўзда тутилган.

Ғ.Ҳасанов, А.Исроилов (сурат), ЎзА мухбирлари