Янги Зеландияда тезлиги соатига 155 кмгача етган кучли шамоллар мамлакат бўйлаб катта талафотлар келтириб чиқарди. Тахминан 90 минг уй электрсиз қолган, юздан ортиқ парвозлар бекор қилинган.

Метеорология хизмати маълумотига кўра, шамоллар ўлканинг жануб ва шимолий ҳудудлари аксарият қисмини қамраб олган. Ҳукумат Кентербери ва Веллингтон минтақаларида қизил даражадаги огоҳлантириш эълон қилди.

Фуқароларга ўз уйларида қолиш, саёҳатлардан вақтинча тийилиш, электр ҳамда алоқа узилишларига тайёр туриш тавсия этилди. Электр тармоқлари асосан жанубий оролда ишдан чиққан, аммо муҳандислар узатишни босқичма-босқич тиклай бошлаган. Айрим жойларда уй томлари учиб кетган, дарахтлар ва электр устунлари қулаган.

Веллингтон шаҳрида эса бир эркак дарахт шохининг босиб қолиши оқибатида ҳалок бўлди. Таъкидланишича, кучли шамоллар Янги Зеландиядаги “иш ташлаш” намойишларига ҳам таъсир кўрсатган. Айрим митинглар ёпиқ жойларга кўчирилди ёки бутунлай бекор қилинди.

Шунга ўхшаш шамол оқими Австралиянинг айрим ҳудудларида ҳам кузатилмоқда. Иссиқ об-ҳаво сабабли у ерда ёнғин хавфи ортган ва оловга қарши огоҳлантиришлар берилган.

Мусулмон Зиё, ЎзА