Шу кунларда “Nurafshon Business City” ҳудудидаги амфитеатр майдонида чинакам Янги йил байрами шукуҳи ҳукмрон бўлган. 30 метрлик муҳташам арча чироқлари порлаётган катта арча 28 мингдан зиёд зумрад ўйинчоқлар билан безатилган.

Унинг расман очилишига бағишланган тантанали тадбирда Тошкент вилояти ҳокими Зойир Мирзаев бошчилигида вилоят фаоллари, кенг жамоатчилик вакиллари иштирок этди. Биргаликда вилоятдаги Янги йил байрам тадбирларига расман старт берилди. Майдонда ўрнатилган декоратив жиҳозлар, безакли атрибутлар Янги йил руҳи ва фалсафасига мос муҳитни ҳосил қилган. Бу ердаги тадбирлар аҳоли вакиллари ва вилоят меҳмонлари, айниқса, байрамнинг бош “қаҳрамонлар”и бўлган кичкинтойлар  учун ҳар тарафлама қулай,  хавфсиз тарзда ўтиши учун барча имкониятлар яратилган. 

Шунингдек, байрамни кўтаринки кайфиятда ўтказиш ва жажжи болажонларни хушнуд этиш учун 100 нафар қорбобо ва қорқиз жалб этилган. Эътиборлиси, жойларда аҳоли, айниқса, болажонлар учун бундай байрамона муҳит яратишда зарур хавфсизлик талабларига риоя қилинган. Режага кўра, бош арча майдонида байрам шодиёналари ҳар куни соат 10:00 дан 22:00 гача давом этади. 

[gallery-26870]

Театрлаштирилган томошалар, бадиий жамоалар чиқишлари, санъат усталари ва ижодкор ёшлар иштирокидаги концертлар, шунингдек, байрам тимсоллари – Қорбобо ва қорқиз, турли эртак қаҳрамонлари иштирокидаги дастурлар ташкил этилмоқда. Байрам тадбирлари 2026 йил 10 январга қадар давом этади. 

А.Мусаев, А.Алижонов (сурат), ЎзА.