Poytaxtimizda O‘zbekiston Respublikasi Prezidenti huzuridagi Strategik islohotlar va rivojlanish agentligi tomonidan strategik rejalashtirishning yangi mexanizmlarini joriy etish va davlat investitsiyalarining oshkoraligini ta’minlash masalalariga bag‘ishlangan davra suhbati bo‘lib o‘tdi.

Davra suhbati davomida O‘zbekistonda o‘tkazilishi rejalashtirilayotgan aholini ro‘yxatga olish bo‘yicha ma’lumot ham taqdim etildi. 

Tadbirda qayd etilganidek, aholi va qishloq xo‘jaligini ro‘yxatdan o‘tkazish strategik rejalashtirishning muhim elementi bo‘lib, ushbu ro‘yxat mamlakatning rivojlanish istiqbollarini aniqlashda asosiy ahamiyatga ega hisoblanadi. Aholining demografik va ijtimoiy-iqtisodiy xususiyatlari haqida aniq ma’lumot olish hamda agrar sektor holatini baholash imkonini beradi. Oxirgi umumiy aholi ro‘yxatga olinishi 1989 yilda o‘tkazilgan.

Birinchi marta qo‘shma format qo‘llaniladi. Jumladan, ilk 17 kun davomida ma’lumotlar internet orqali onlayn to‘planadi, shuningdek keyinchalik uyma-uy (har kvartira bo‘yicha) soha tekshiruvi «mahalla yettiligi» vakillari ishtirokida o‘tkaziladi. Xalqaro amaliyotdan kelib chiqqan holda Jahon banki, Birlashgan Millatlar Tashkilotining Aholishunoslik jamg‘armasi va Oziq-ovqat va qishloq xo‘jaligi tashkiloti ishtirokida ishlab chiqilgan yangi, soddalashtirilgan format xarajatlarni 1,3 trillion so‘mga qisqartirish imkonini beradi.

Shuningdek, tadbir davomida investitsiya va monitoring jarayonlarining oshkoraligi, samaradorligi hamda qulayligini keskin oshirishga qaratilgan Geoportal taqdimoti o‘tkazildi.

Qayd etilganidek, ushbu raqamli platforma ishga tushirilishi “O‘zbekiston – 2030” strategiyasi, tarmoq strategiyalari va davlat dasturlarida belgilangan ustuvor maqsad va vazifalarga erishishga qaratilgan.

Jumladan, davlat va fuqarolar uchun mo‘ljallangan funksional imkoniyatlar geoportal davlat investitsiyalarini rejalashtirish uchun muhim vosita sifatida yaratilgan bo‘lib, u fuqarolarning real ehtiyojlari va infratuzilmalarning joriy holati asosida dasturlarni shakllantirish imkonini beradi.

Platforma qulayliklari shundan iboratki, barcha ijtimoiy ob’ektlarning holatini real vaqt rejimida raqamlashtirish va kuzatib borish, vazirlik va idoralar o‘rtasida harakatlarni muvofiqlashtirish, ijtimoiy ob’ektlar tarmog‘ini rivojlantirish bo‘yicha qarorlarni real ma’lumotlar asosida qabul qilishni ta’minlaydi.

Gulnoza Boboyeva, O‘zA