Навоий шаҳридаги “Ёшлар маркази”да “Янги Ўзбекистон – янгича дунёқараш” шиори остида маърифий-маданий тадбир бўлиб ўтди.

Таниқли олимлар, эл севган санъаткорлар, иқтидорли ёшлар иштирок этган тадбирда юртимизда амалга оширилаётган ишлар, Ўзбекистоннинг мустақиллик йилларида, хусусан, сўнгги беш йилликда эришган натижалари, қўлга киритилаётган ютуқлар ҳақида маълумот берилди.

– Мана бугун маҳалламиз аҳли учун катта байрам тадбири ташкил этилди, – дейди тадбир иштирокчиларидан бири Машҳура Абдурафиқова. – Дастлаб ёшларимиз қўл меҳнати билан яратилган ҳунармандчилик маҳсулотлари, чизган расмлари кўргазмасини кўздан кечирдим. 

Очиғи лол қолдим. Ҳали 10 ёшга ҳам тўлмаган ўғил-қизларимизнинг истеъдод ва иқтидорларини кўриб, юртимиздаги тинчлик ва барқарорликка, Юртбошимиз томонидан олиб борилаётган ишлар, айниқса, “Беш ташаббус лойиҳалари” бугун ўз самарасини бераётганлигига яна бир бор гувоҳ бўлдим.

– Бугунги кунда биз, ёшларга Давлатимиз раҳбари томонидан барча имкониятлар ва имтиёзлар яратиб берилмоқда. Фақатгина биз улардан оқилона ва унумли фойдаланишимиз лозим. Бизга ишонч билдирилмоқдами, демак биз ҳам масъулиятни ҳис қилган ҳолда билим олишимиз, ҳунар ўрганишимиз орқали юртимиз тинчлиги, Ватанимиз тараққиётига ҳисса қўшмоғимиз даркор, – дейди “Мард ўғлон” давлат мукофоти соҳиби Сухроб Ҳайдаров.

Тадбир давомида Ўзбекистонда хизмат кўрсатган артист Меҳриддин Раҳматов, “Шуҳрат” медали соҳиби Расулхон Қодирхонов, хонандалар Дилфуза Қобилова, Отабек Муталхўжаевлар томонидан ижро этилган саҳна кўринишлари ва куй-қўшиқлар маҳалла аҳлида катта таассурот қолдирди. Тадбир сўнгида 2-сектор раҳбари, Навоий шаҳар прокурори Худойберди Норқобилов маҳалланинг бир гуруҳ фаол вакиллари ва ёш спортчиларга “Ташаккурнома”, “Диплом” ва эсталик совғаларини топширди.

“Янги Ўзбекистон – янгича дунёқараш” шиори остида ўтказилётган маърифий-маданий тадбирлар вилоят бўйлаб давом этмоқда.

Абдували Бўриев, ЎзА