2020 йил январь ойидан нашр этиб келинаётган “Янги Ўзбекистон” газетаси медиаконвергенция асосида такомиллашиб бормоқда. Ўтган вақт давомида таҳририят ходимлари газета нашр этишнинг энг замонавий босқичларини жорий қилиб келаётгани ҳам эътирофга лойиқ.

Мамлакатимизда биринчилардан бўлиб “Янги Ўзбекистон” газетаси мультимедиа асосида ахборот тақдим этишни бошлаган эди. Яъни, газета учун тайёрланган материаллар бир вақтнинг ўзида матн, видео, фото ва аудио кўринишида ўқувчиларга тақдим қилиб келинаётган эди. Бунда газетада чоп этилган мақолага QR-код қўйилиб, уни сканер қилиш орқали ушбу мақоланинг видео, аудио ва фотосини кўриш мумкин эди. 

Сўнгги вақтларда таҳририят жамоаси яна бир яхши янгиликни жорий қилишди. Бу газетада чоп этилган мақолаларнинг лотин ёзувига асосланган ўзбек алифбосидаги электрон вариантини ўқиш имконияти яратилди. 

Бу эса газета ўқувчилари ичида жуда кўтаринкилик билан кутиб олинди. 

Бугун, 2023 йил 2 июндан бошлаб эса кўп сонли газетхонларнинг талабига биноан “Янги Ўзбекистон” газетаси тўлиқ лотин ёзувида ҳам саҳифаланмоқда. 

Газета лотин алифбосида саҳифаланиб, электрон газета сифатида ўқувчиларга тақдим этиб борилади. 

Бу эса юртимиздаги 7 ёшдан 70 ёшгача бўлган барча муштарийлар кутган янгилик бўлди.