Ўзбек Миллий академик драма театри мамлакатимиз театр жамоалари орасида ўзининг залворли репертуари, катта ижодий тажрибаси, юксак мавқе ва мақоми билан ажралиб туради. Мазкур ижодий жамоа 111-ижодий мавсумини “Биринчи қалдирғоч” (“Маъсума”) спектакли билан бошлади.

Шу муносабат билан ташкил этилган маърифий тадбирда Ўзбекистон Республикаси маданият вазири Озодбек Назарбеков, ижодкор зиёлилар, профессор-ўқитувчилар, талаба-ёшлар, театр мухлислари иштирок этди.  

Ўзбек Миллий академик драма театри директори, Ўзбекистон халқ артисти Ёдгор Саъдиев ва бошқалар мамлакатимизда миллий театр санъатига қаратилаётган эътибор янги бадиий баркамол асарларни яратишга туртки бераётганини таъкидлади. “Маъсума” спектакли ана шундай эътиборнинг натижасидир.

Ўзбекистон халқ ёзувчиси Исажон Султон асари асосида режиссёр Асқар Холмўминов томонидан саҳналаштирилган ушбу спектакль мазкур театрда фаолият кўрсатган маърифатпарвар санъаткор Маъсума Қориеванинг тақдири, бошига тушган оғир кунлар, унинг истеъдоди, поймол бўлган орзу-умидлари ҳақида ҳикоя қилиши билан диққатга сазовор.  

Спектакль теран тарихий аҳамиятга эга экани билан эътиборли.  Ўтган аср бошларида ушбу театрда аёллар ролини жасорат билан ижро этган санъаткор Маъсума Қориеванинг ҳаёти ҳам шўроларнинг қатағон қиличидан четда қолмаган эди. Унинг умр йўлдоши Босит Қориев репрессияга учрагач, бунинг аччиқ оқибати Маъсума  Қориева тақдирига ўз таъсирини ўтказган эди. Актриса саҳнага чиқишдан маҳрум этилган эди...Иккинчи жаҳон уруши бошлангач, опа “Қатағонга учраган умр йўлдошимга енгиллик бўлар”, деб икки ўғлини фронтга юборади. Бироқ, на турмуш ўртоғидан, на фарзандларидан дарак бўлмагач, Маъсуманинг ўзи Москвага йўл олади. Оила бошлиғи отилган, ўғиллари урушда ҳалок бўлганини эшитган Маъсуманинг юраги бундай мусибатга дош беролмайди...  

Спектакль гарчи таниқли актриса ҳаёти, унинг оғир тақдири ҳақида ҳикоя қилса-да, ушбу асар барча томошабинларни тинч ва осойишта кунларнинг, ҳаётнинг, тирикликнинг, мустақиллигимизнинг, ёруғ кунларимизнинг қадрига етишга чорлаши билан диққатга сазовор.  

Н.Усмонова,  

ЎзА