Joriy yilning 3-7 iyul kunlari “Yangi O‘zbekiston: taraqqiyot, innovatsiya va ma’rifat” mavzusidagi xalqaro sheriklik tashabbuslari haftaligi, “O‘zbekiston madaniy merosi – Yangi renessans asosi” madaniy tadbirlar haftaligini o‘tkaziladi. Poytaxtimizda mazkur haftaliklarning tantanali ochilishi bo‘lib o‘tdi.

Shu munosabat bilan tashkil etilgan tantanali tadbir  “O‘zbekfilm” kinokonserni Davlat unitar korxonasi  hududidagi “Event hall” binosining ochilish marosimi bilan uyg‘un tarzda o‘tkazildi. 

O‘zbekiston Respublikasi Oliy Majlisi Senati Raisining birinchi o‘rinbosari Sodiq Safoyev, Oliy Majlis Qonunchilik palatasi Spikerining  birinchi o‘rinbosari Akmal Saidov, madaniyat va turizm vaziri Ozodbek Nazarbekov va boshqalar O‘zbekistonni jahonga tatitadigan eng ustuvor jihat uning moddiy-madaniy, ma’naviy merosi ekanini ta’kidladilar.

Yangilanib borayotgan O‘zbekistonimizda boy madaniy merosimizni o‘rganish, ularning mazmun-mohiyatini keng targ‘ib etish borasida mutlaqo yangicha yondashuv asosida ish olib borilmoqda .

"Yangi O‘zbekiston: taraqqiyot, innovatsiya va ma’rifat” mavzusidagi

xalqaro sheriklik tashabbuslari haftaligi, “O‘zbekiston madaniy merosi – Yangi renessans asosi” madaniy tadbirlar haftaligi milliy merosimizni tadqiq etish, bu borada xorijlik va yurtimiz olimlarining o‘zaro muloqoti uchun keng imkoniyatlar yaratish, kelgusidagi amaliy rejalarni belgilab olishdek maqsadlarni ko‘zlaydi. Unda jahonning ko‘plab davlatlaridan vakillar ishtiroki kutilmoqda.

 "O‘zbekfilm” kinokonserni Davlat unitar korxonasi  hududidagi “Event hall” binosi ijodkor ziyolilar, olimlarning o‘zaro fikr almashishi, muloqot qilishi, turli ma’rifiy loyihalar taqdimoti uchun o‘ziga xos platforma vazifasini o‘taydi.

Ma’rifiy haftaliklar doirasida madaniy merosimizni o‘rganish yuzasidan muzeylar, san’at maskanlarida uchrashuvlar, taqdimotlar, anjumanlar, filmlar namoyishi va  muhokamalari o‘tkazilishi rkjalashtirilgan.

Ma’rifiy haftaliklar olimlar, tadqiqotchilar, muzeyshunoslar, qadimshunoslar, umuman, ijod ahli uchun g‘oyat qiziqarli va foydali, unumli bo‘lishi kutilmoqda.

Qisqa fursatda qurib foydalanishga topshirilgan   “Event hall” binosi bir necha muhtasham zallar, muloqot pavilonlaridan iborat bo‘lib, ular eng zamonaviy talab va andozalar darajasida barpo etilgani bilan diqqatga sazovordir.

Ma’rifiy haftaliklar teatrlashtirilgan musiqiy dasturlar namoyishi bilan boshlandi.

Nazokat Usmonova, O‘zA