Куни кеча Ўзбекистон халқ артисти Юлдуз Усмонованинг онлайн концертини наинки мамлакатимизда, балки хорижий давлатларда ҳам мусиқа ихлосмандлари катта қизиқиш ва эътибор билан тинглади.

Бугунги оғир кунларда қийинчиликлар, қалбдаги ғашликларни, саросималарни лаҳзага бўлса-да унутишга айнан шундай жонли концертлар яқиндан ёрдам бермоқда.

Тўғриси, синовли кунларнинг аввалида “бундай қийин дамларда концертнинг кимга кераги бор, қулоққа қўшиқ ёқмай турибди ўзи“ дегувчилар ҳам топилди. Лекин воқелик бу каби ўйларнинг мутлақо пуч эканини кўрсатди.

Аксинча, бундай жонли ижродаги онлайн концертлар ҳар қачонгидан ҳам керак экани яққол аён бўлмоқда. Барчанинг руҳияти, кайфияти имкон қадар кўтарилмоқда. Кўнгилда хотиржам, ғуборсиз, осуда кунларга ишонч янада ортмоқда.

.. .Хонанда юракларни сел қилиб куйламоқда. “Алла“, “Болалигим, сени соғиндим“, “Яна баҳор“, “Настарин“, “Икки дарахт“... Хазин, жўшқин, лекин бари ғоят ажойиб қўшиқлар. Ижроси орқали барчага тинчлик, омонлик, соғлик, сабр, сабот тилайди. Санъаткорнинг рақслари ҳам жозибали, мафтункор. Манаман деган раққосалар ижросини ортида қолдириб юборади.

Ҳа, қалбга кўтаринкилик, завқ улашувчи бундай мусиқий гулдасталар бугун ҳар қачонгидан ҳам одамларга керак. Зеро, ҳаётимиз фақатгина бир қоп картошка ё гуручдан иборат эмас!