Kitob zamonaviy ko‘rinishga ega bo‘lib, unga shoirning turli yillarda yozilgan, nafis tuyg‘ulari yo‘g‘rilgan she’rlari kiritilgan. 

Mitti kitobdan o‘rin olgan “Hayot go‘zal”, “Oq sukunat”, “Fonuslar”, “Dekabrning so‘ngi kunlari”, “Sevgi dunyosi”, “Opam haqida ballada”, “Tishsiz she’r”, “Muhabbat quchog‘ida” kabi she’rlarini o‘qisangiz, tuyg‘ularingiz yangilanadi, shoir ilhomidan yuragingiz taskin topib, ruhiyatingiz yengillashadi. 

“Chayqalgan qayiqlarda” kitobi quyidagi she’r bilan boshlanadi:

Kulib-kulib, yashadim qancha,

Yig‘lab-yig‘lab, qancha yashadim!

Haqiqatni dilga tukkancha,

Bu dunyoda ancha yashadim.

Musiqani sevib yurakdan,

Aylantirdim umrimni sozga;

Bitta bo‘lib quloq, yurak, tan,

Nom baxsh etdi nomsiz ovozga.

Olam kezdim yurtimni sevib,

Qadamimdan duv to‘kildi vaqt.

So‘zlarimni erk bilan yuvib,

Men o‘stirdim She’r degan daraxt.

Bir daraxtki, shamollarga ham 

Berar ovoz, berar ojiz til;

Bir daraxtki, xayollarga ham

Rang ulashib, qilar yam-yashil. 

Tebranadi mening daraxtim,

Mangu so‘lmas bog‘larga oshno.

Udir mening ildizli taxtim,

U so‘z bo‘lib evrilgan dunyo!