Янги истиқболли келишувлар: Ўзимизнинг маҳсулотлар Хитой бозорига
Мамлакатимиз ҳамда Хитой ўртасидаги алоқаларнинг ривожланиши йилдан-йилга янги босқичга кўтарилмоқда.
Мамлакатимиз ҳамда Хитой ўртасидаги алоқаларнинг ривожланиши йилдан-йилга янги босқичга кўтарилмоқда. Қишлоқ хўжалиги соҳасидаги ҳамкорлик исботи ўлароқ, кўплаб келишувлар ижобий тус олмоқда.
Хусусан, Ўзбекистон ҳамда Хитой карантин хизматлари ўртасида бўлиб ўтган музокаралар натижасида Республикамиздан қовун етказиб бериш учун 173 та экспорт далалари ҳамда 10 та қадоқлаш корхонасига рухсат олинди. Бу эса ўз ўрнида, экспортёрлар учун даромад ҳажмини ошириб, иқтисодиётга сезиларли таъсир кўрсатади.
Шунингдек, мош экспорти учун қадоқлаш корхоналари сони 3 тага оширилиб, умумий 43 та корхона эндиликда ушбу дуккакли маҳсулотни Хитойга етказиб бериши мумкин.
Қуритилган аччиқ қалампир экспорти бўйича эса баённома имзоланишига эришилди. Унга кўра, ушбу турдаги маҳсулот тайёрлайдиган компаниялар ўз товарларини тўғридан-тўғри Хитойга етказиб беришлари учун экспортёрлар рўйхатига киришлари лозим. Бунда тадбиркорлар Ўсимликлар карантини давлат инспекциясига мурожаат қилишлари сўралади.
«Ўздавкарантин» инспекцияси ахборот хизматидан хабар беришларича, истиқболли келишувлар қаторидан ерёнғоқ экспорти ҳам ўрин олган. Эндиликда 20 та қадоқлаш корхонаси маҳсулот етказиб бериши мумкин.
Юқорида қайд этилган корхоналар рўйхати билан инспекциянинг расмий веб-сайти (www.karantin.uz) орқали танишиш мумкин.
Айтиш ўринлики, мамлакатимизда етиштириладиган қишлоқ хўжалиги маҳсулотлари учун янги ва қўшимча хориж бозорлар очилмоқда, ҳаракатлар эса натижа билан намоён. Бироқ мазкур йўналиш – экспорт соҳасида камчиликлар талайгина. Мулоҳаза қилиб кўринг, агар сиз маҳсулотни фақатгина етиштиришни билсангиз, шунга яраша даромад кўрасиз. Етиштириш билан бирга, сифатли қадоқлаш, маркетинг каби хизматлардан ҳам яхшигина хабардор бўлсангиз, бир неча баравар юқори даромад оласиз. Оғриқли нуқта ҳам шунда: биз фақат маҳсулотни далада етиштириб, экспортга жўнатмоқдамиз, мамлакат иқтисодиёти эса бир маромда секинлик билан ўсмоқда. Ваҳоланки, логистика марказларини ташкил этиш учун имкониятлар етарли, бироқ, ташаббус кам.
Ўзбекистонда етиштирилган қишлоқ хўжалиги маҳсулотларининг мазасини хорижнинг ҳаттоки энг илғор мамлакатлари экспертлари ҳам эътироф этишади. Бироқ, тан олиш керакки, дунё бозорларида маҳсулот қадоқланиши мижозни ўзига тортмайди, юқори таннархда белгиланмайди. Шу боисдан, эндиги жараёнда тадбиркорларимиздан даромад ҳажмини сифат ва қадоқлашдан келиб чиққан ҳолда, режалаштиришлари мақсадга мувофиқ.