Бугун Самарқанд вилоятининг Иштихон туманида бир қатор ижтимоий-иқтисодий объектлар фойдаланишга топширилди.

Шу муносабат билан ўтказилган тадбирларда вилоят ҳокими ва бир қатор бошқарма, идоралар раҳбарлари, фаоллар, туман жамоатчилиги вакиллари иштирок этди.  

Дастлаб туманда янги бунёд этилган спорт мактаби универсал спорт зали фойдаланишга топширилди. Лойиҳа қиймати 5 миллиард сўм бўлган мазкур иншоотда мини-футбол, гандбол, баскетбол, волейбол каби спорт турлари билан шуғулланиш учун учун барча имконият мавжуд.

– Иштихонлик спортчилар нафақат республика, балки Осиё ва жаҳон чемпионатларида юқори натижаларни қўлга киритиб келяпти, – деди вилоят ҳокими Э.Турдимов. – Масалан, мамлакатимиз боксчи хотин-қизларидан биринчи жаҳон чемпиони, "Париж-2024" олимпиадаси иштирокчиси Нигина Ўктамова ҳам шу юрт фарзанди. Яна ўнлаб иштихонлик спортчилар терма жамоа таркибида халқаро мусобақаларда мамлакатимиз шарафини муносиб ҳимоя қилмоқда. Ушбу спорт иншооти ана шундай чемпион спортчилар зафарлари туфайли Иштихонда бунёд этилди ва бу ердан яна кўплаб маҳоратли спортчилар етишиб чиқишига ишонамиз.  

[gallery-19325]

Янги бинонинг рамзий лентасини ҳам иштихонлик чемпионлар қирқди.  

Туман мудофаа ишлари бўлими шу пайтгача эски бинода фаолият кўрсатарди. Эндиликда бўлим учун янги бино бунёд этилиб, ходимлар ва чақирилувчилар учун зарур шароит яратилди.  

Бино ёнида поликлиника ҳам ташкил этилмоқда ва бу ҳарбий хизматга чақирилаётган ёшларни тиббий кўрикдан ўтказиш учун қулай имконият бўлади.  

Шундан сўнг хитойлик тадбиркорлар билан ҳамкорликда ташкил этилган “Ishtihan yimin import export group” корхонасининг қишлоқ хўжалик маҳсулотларини сақлаш, қайта ишлаш ва экспорт қилишга мўлжалланган янги лойиҳаси ишга туширилди. Умумий қиймати 5 миллион АҚШ долларини ташкил этадиган мазкур лойиҳа доирасида бу ерда йилига 2 минг тонна қишлоқ хўжалик маҳсулотлари қайта ишланади. 50 та доимий иш ўрни яратилади.  

Бугун фойдаланишга топширилган туман санитария-эпидемиологик осойишталик ва жамоат саломатлиги бўлими, туман тиббиёт бирлашмаси ногиронлиги бўлган шахсларни тиббий реаблитация қилиш бўлимининг янги биноларида ҳам ходимлар ва уларга мурожаат қилувчи учун барча имконият ва қулайликлар яратилган. Бинолар замонавий жиҳозлар билан таъминланган.

Ғ.Ҳасанов, А.Исроилов (сурат), ЎзА мухбирлари