Ўзбекистондаги Yandex дастурлаш мактабида илк битирув оқшоми бўлиб ўтди. Унинг ўқувчилари бир йил давомида Python тилида саноат дастурлашни бепул ўрганди. Компания вакиллари битирувчиларни табриклади ва уларга келгусида муваффақиятлар тилади. 

Yandex дастурлаш мактаби STEM-таълимдан фойдаланишни қўллаб-қувватлаш бўйича компания дастурининг бир қисми ҳисобланади. Илк мактаб ўтган йили Тошкентда очилган бўлиб, яқин кунларда  Самарқанд ва Урганчда яна иккита мактабни ишга тушириш режалаштирилган. 

– Дастурлаш мактабидаги таълим ўқувчиларга нафақат дастурлашни ўзлаштириш, балки танқидий фикрлашни ҳам ривожлантиришга ёрдам беради. Улар жамоа бўлиб ишлаган ҳолда вазифаларни ечишнинг турли хил усулларини топишни ўрганади. Ушбу кўникмалар IT-соҳасида муваффақиятга эришиш учун асос бўлади. Дастурни муваффақиятли якунлаган йигитларни табриклаётганимдан жуда хурсандман, – дейди Yandex Go компаниясининг Ўзбекистондаги минтақавий менежери Юрий Ли. 

Yandex IT-таълим дастури доирасида информатика ўқитувчилари учун дастурлаш бўйича курслар ҳам йўлга қўйилиб, улар учун Python бўйича методик материаллардан фойдаланиш имконияти яратилади. Шу билан бирга жорий йилда компания стажировка учун ёш  IT-мутахассисларини қабул қилишни бошлайди, бу  Yandex учун ҳам, бутун Ўзбекистон IT-соҳаси учун ҳам кадрлар захирасини шакллантириш имконини беради. 

Дастурлаш мактаби – дастурлаш ва аниқ фанларга қизиқадиган юқори синф ўқувчилари учун Yandex тақдим этадиган бепул таълим лойиҳасидир. Ўзбекистонда лойиҳа Yandex Go компанияси кўмагида амалга оширилди. Битирувчилар Google, Facebook ва Huawei каби IT-компаниялари ўтказадиган йирик халқаро хакатон ва олимпиадаларда иштирок этади, WorldSkills Junoirsда муваффақиятли қатнашиб, ихтисослаштирилган, жумладан хориждаги олий таълим муассасаларига ўқишга кириш имкониятига эга бўлади. 

Роман Бондарчук тайёрлади, ЎзА мухбири