Буюк Британия, ГФР ва Франция Эрон билан ядровий битимни бузиш ниятида. Бу ҳақда “The Guardian” газетаси хабар тарқатди.

– Яқинда Буюк Британия ва Европанинг яна икки қудратли давлати Эрон билан 2015 йил имзоланган ядровий битимни бузиш режасини эълон қилади, – дейилади мақолада. – Улар Теҳронга нисбатан қўланаётган санкция бекор қилинмаслиги тасдиқлангандан сўнг мазкур режа ҳам ошкор қилинади.

Аниқлик киритилишича, Европа мамлакатларининг ушбу қарорига Эрон гўё Россияга дрон сотаётгани, келажакда баллистик ракета ҳам таклиф этиши эҳтимоли сабаб бўлган. Таъкидланишича, “Келишув бузилиши муайян таҳдидни келтириб чиқариши мумкин. Зеро, бунга Теҳрон қандай жавоб бериши ҳозирча номаълум. Асосий хавф шундаки, Эрон уранни қурол ишлаб чиқариш учун етарли даражада бойитиш имкониятига яқин турибди”.

2015 йил Германия, Франция, Буюк Британия, Хитой, Россия, АҚШ ва Эрон биргаликда кенг қамровли ҳаракат режасини имзолаган. Ҳужжат Теҳрон ядро дастурини чекласа, мамлакатга нисбатан қўлланаётган санкция бекор қилиниши назарда тутилади.

2018 йил Дональд Трамп АҚШ мазкур битимдан чиққанини маълум қилган.