Тошкентда бокс бўйича 22 ёшгача бўлган спортчилар ўртасидаги қитъа чемпионати бошланишига саноқли кунлар қолди.

Хабар берганимиздек, жорий йилнинг 20-30 январь кунлари ўтказиладиган чемпионатда қозоғистонлик боксчилар қатнашмайди.

Бугун 18 январь кунги ҳолат бўйича яна иккита терма жамоа мамлакатимиз пойтахтида ўтадиган нуфузли мусобақада эпидемиологик вазият туфайли иштирок этмаслигини билдирган.

Ҳиндистон ва Таиланд вакиллари илк бор ўтказилаётган мазкур қитъа чемпионатида қатнашмаслигини маълум қилган бўлса, Саудия Арабистони ва Япония терма жамоалари шу кунларда Тошкентда мусобақаларга ҳозирлик кўрмоқда.

Ўзбекистон бокс федерациясидан билдиришларича, айни кунларда аёллар ва эркаклар ўртасидаги қитъа чемпионати ўтказиладиган “Универсал” спорт мажмуасида тайёргарлик ишлари қизғин олиб борилмоқда.

Чемпионатнинг расмий очилиш маросими 22 январь  куни ўтказилади. 21 январь куни эса мандат комиссиясининг йиғилиши ҳамда қуръа ташлаш маросими бўлиб ўтади.

Ушбу чемпионатда ватанимиз шарафини ҳимоя қиладиган эркаклар терма жамоасини мусобақаларга Тўлқин Қиличев бошчилигидаги мураббийлар тайёрлаган бўлса, аёллар жамоасини тажрибали мутахассислар Лочин Қўчқоров ва Элшод Расулов ҳозирлашди.

Ҳар иккала терма жамоа кеча Тошкент вилоятидаги “Янгиобод” спорт мажмуасида сўнгги машғулотларни ўтказди.

Эслатиб ўтамиз, Осиё чемпионатида қитъанинг 20 га яқин давлатидан 200 нафарга яқин чарм қўлқоп усталари қатнашиши кутилмоқда.

Унда эркаклар 13 та вазнда, қизлар 12 та вазнда баҳслашишади.

Тўлқин Рўзиев, ЎзА