Айни кунларда “Ўзэнергоинспекция” томонидан кучайтирилган тартибда назорат тадбирлари олиб борилмоқда.

Инспекциянинг Навоий вилоят ҳудудий бошқармаси ва ҳуқуқни муҳофаза қилувчи органлар билан ҳамкорликда ўтказилган шундай тадбирларда икки ҳолатда электр энергиясидан ноқонуний фойдаланиш ҳолатлари ошкор этилди.  

Унда маълум бўлишича, “О.П.Н.” МЧЖ раҳбари А.И. Навоий шаҳридаги парранда етиштириш биносида 3 дона “Innosilicon T3+” русумли майнинг қурилмаларни тармоққа улаб, электр энергиясидан ноқонуний фойдаланган.  

Ушбу қоидабузарлик натижасида давлат манфаатларига 106,5 миллион сўмлик зарар етказилган. Ҳозир ҳолат юзасидан А.И. га нисбатан Жиноят кодексининг 169-моддаси 2-қисми “д” банди билан жиноят иши қўзғатилиб, процессуал тартибда ушланган.  

Шунингдек, Кармана туманидаги “Д.Н.” фермер хўжалиги 145,3 миллион сўмлик электр энергиясидан ноқонуний фойдаланган.  

Аниқланишича, “Д.Н.” фермер хўжалиги масъуллари ушбу туманда жойлашган экин майдонини суғориш учун ўрнатилган сув насосини шартномасиз тармоққа ўзбошимчалик билан улаб, электр энергиясини ўғринча ишлатиб келган.  

Мазкур ҳолат юзасидан ҳужжатлар ҳуқуқни муҳофаза қилувчи органларга юборилди,  дейилади “Ўзэнергоинспекция” хабарида. 

Н.Зиёдуллаева,

ЎзА