Davlatimiz rahbaring Yaponiyaga tashrifi hamda “Markaziy Osiyo + Yaponiya” sammiti haqida qator xorijiy nashrlarda maqolalar chop etilmoqda. Jumladan, Pokistonning “Islamabad Post” elektron gazetasida “O‘zbekiston-Yaponiya: Strategik sheriklik kengaymoqda” sarlavhali maqola e’lon qilindi.

Unda ta’kidlanishicha, 1992 yil 26 yanvarda ikki o‘lka o‘rtasida diplomatik munosabatlar o‘rnatilganidan beri O‘zbekiston-Yaponiya hamkorligini rivojlantirish mamlakatimiz Osiyo-Tinch okeani mintaqasi bo‘yicha tashqi siyosatining asosiy ustuvor yo‘nalishi bo‘lib kelgan. O‘zaro hurmat va ishonchga asoslangan holda, Toshkent va Tokio hozirda siyosat, xavfsizlik, iqtisodiyot, investitsiya, innovatsiya, ta’lim, madaniyat, turizm va mintaqaviy hamkorlikni qamrab oluvchi ko‘p tomonlama hamkorlikni rivojlantirmoqda. 

– O‘zbekiston va Yaponiya muloqoti rivojlanishining burilish nuqtasi Prezident Shavkat Mirziyoyevning 2019 yil dekabr oyida Yaponiyaga rasmiy tashrifi bo‘ldi, bu yirik qo‘shma iqtisodiy, investitsiya va gumanitar loyihalarni amalga oshirishga kuchli turtki berdi, -deyiladi nashrda.

Muallifning yozishicha, hozirda O‘zbekistonda Yaponiya kapitali ishtirokidagi 84 ta qo‘shma korxona faoliyat yuritmoqda va mamlakatda neft-gaz, kimyo, mashinasozlik, logistika, ta’lim va turizm sohalarida ish olib boruvchi 13 ta yirik yapon kompaniyasining vakolatxonalari mavjud.

Ayniqsa, ikki o‘lka munosabatlarining madaniy va gumanitar jihatlari alohida ahamiyatga ega. Masalan, O‘zbekiston-Yaponiya do‘stlik jamiyati, Fukushima-O‘zbekiston uyushmasi va Yaponiya-O‘zbekiston uyushmasi yigirma yildan ortiq vaqt davomida faol faoliyat yuritib kelmoqda. Toshkentda o‘rnatilgan Xirosima tinchlik toshi va poytaxt markazidagi Yapon bog‘i allaqachon xalqlarimiz o‘rtasidagi mustahkam do‘stlikning ramziga aylangan.

Go‘zal Sattorova, O‘zA