Urganch shahrida “Hamshira-2025” ko‘rik-tanlovining viloyat bosqichi o‘tkazildi.

Hamshiralarning  kasbiy  bilim va malakalarini  oshirib  borishni  qo‘llab - quvvatlash, faoliyati davomida yaxshi natijalarga  erishib  kelayotganlarini  moddiy  va  ma’naviy  rag‘batlantirish,  ular faoliyatini  ommalashtirish, o‘z  kasbining  mohir  egalari  o‘rtasida  sog‘lom  raqobat  muhitini shakllantirish maqsadida tashkil qilingan tanlovda viloyatdagi tuman  va  shahar davolash-  profilaktika muassasalari, tibbiyot  birlashmalaridan  saralangan  hamshiralar   ishtirok etdi.

Tanlov ishtirokchilari to‘rtta shart asosida o‘z bilimlarini sinovdan o‘tkazdi.  

– Tanlov tasdiqlangan nizom shartlari asosida o‘tkazildi, – deydi viloyat sog‘liqni saqlash boshqarmasi bosh hamshirasi Bikajon Matjonova. – Unda hamshiralarning mahorati murojaat qilgan bemorlarni qabul qilish, ahvolini aniqlash  va tibbiy yordam ko‘rsatish, ijtimoiy- siyosiy bilimlarga oid shartlar bo‘yicha baholandi.  Ishtirokchilar nazariy hamda ijtimoiy - siyosiy savollarga zukkolik va chaqqonlik bilan javob berishga harakat qildi.  

Hamshiralar bilim va mahorat borasida bir- birlaridan aslo qolishgani yo‘q. Kimdir amaliyotda, kimdir nazariy,  ijtimoiy- siyosiy jihatdan, kimdir esa o‘z bilim va iste’dodi bilan hakamlar hay’ati e’tiboriga tushdi.  

Yakuniy natijalarga ko‘ra, Yangibozor tuman tibbiyot birlashmasi  qabul hamshirasi Dilafro‘z Xalilloyeva yilning eng yaxshi hamshirasi deya, e’tirof etildi.  

Bog‘ot tumanidagi 3-son oilaviy poliklinikasi hamshirasi Dildora Davletova 2-o‘rin,  Yangiariq tuman tibbiyot birlashmasi  hamshirasi  Sohiba Botirova esa 3-o‘ringa loyiq ko‘rildi.  

G‘oliblar, faol ishtirokchilar  viloyat  sog‘liqni saqlash boshqarmasi,  O‘zbekiston hamshiralar assotsiatsiyasi  viloyat  bo‘linmasi  hamda O‘zbekiston sog‘liqni saqlash xodimlari kasaba uyushmasi viloyat kengashining qimmatbaho sovg‘alari bilan taqdirlandi.

Ahmadjon Shokirov,

Behzod Saidov(surat), O‘zA muxbirlari