Urganch olimpiya va paralimpiya sport turlariga tayyorlash markazi bazasida yengil atletika bo‘yicha Xorazm viloyat chempionati o‘tkazildi.

Unda  12 hamda 18 yoshgacha bo‘lgan  sportchilar kuch sinashdi.  

–Musobaqada jami 320 nafar atlet ishtirok etib, ularning 120 nafari qizlardan iborat bo‘ldi.  

O‘n ikki yosh toifasidagi sportchilar  musobaqasining maqsadi  iqtidorli o‘smirlarni saralab,  Urganch olimpiya va paralimpiya sport turlariga tayyorlash markaziga qabul qilishdir, – deydi murabbiy  Muhammad Qurbonov. – O‘n sakkiz yoshgacha bo‘lgan o‘smirlar o‘rtasidagi bahslar esa  yengil atletikachilarning imkoniyatlarini yana bir bor sinovdan o‘tkazishga hamda viloyat terma jamoasini shakllantirishga xizmat qiladi. Bundan tashqari, joriy yilning 10-12 iyun kunlari Toshkent shahrida bo‘lib o‘tadigan respublika chempionatida ham xorazmlik atletlar kuchli tarkib bilan munosib ishtirok etishini ta’minlaydi.

Musobaka ishtirokchilari qisqa va o‘rta masofalarga yugurish, estafetali yugurish,  g‘ovlar osha yugurish, nayza, disk, to‘p  uloqtirish, yadroni itqitish kabi shartlarda o‘z imkoniyatini sinab ko‘rdilar.  

Mutaxassislar fikriga ko‘ra,   musobaqalar  yuqori darajada o‘tdi va yangi iqtidorlarning  nomlari  aniq bo‘ldi. Ba’zi rekordlar ham yangilandi.  

O‘n ikki yosh tifasidagi o‘smirlar o‘rtasida Farangiz Inoyatova va Iskandar Iskandarovlar 100 hamda 600 metrlik masofaga yugurish bo‘yicha viloyat rekordini yangilashdi.

O‘n sakkiz yosh toifasidagi atletlar orasida O‘rta Osiyo chempionati sovrindori Ruslan  Sadullayev  nayzani 71 metrga  uloqtirdi va shaxsiy rekordini yangiladi. 110 metrga g‘ovlar osha yugurishda   esa Rustambek Rustamov Xorazmdagi rekordni yangiladi.  

Umumjamoa hisobida Urganch olimpiya va paralimpiya sport turlariga tayyorlash markazi, Xonqa, Hazorasp va Shovot tumanlari sport maktablarining  vakillari turli yunalishlarda yuqori natijalarni  ko‘rsatishdi.  

Ahmadjon Shokirov,  

Behzod Saidov(surat, video),

O‘zA muxbirlari