Finaldagi seriyaning ilk qarama-qarshiligida “Binokor” jamoasiga 5:2 hisobida imkoniyatni boy bergan “Semurg‘” xokkeychilari bu gal g‘alaba uchun astoydil harakat qildi. O‘yinning asosiy vaqtida kuchlar teng keldi – 4:4. Natijada jamoalar 5 daqiqadan iborat yana ikkita davrada kuch sinashishdi.

Ko‘pchilik o‘yin g‘olibi bullitlar seriyasida aniqlanishini taxmin qilib turgan bir pallada “Semurg‘” jamoasi a’zolari g‘alaba shaybasini kiritdi: “Binokor” – “Semurg‘” – 4:5.

Shu tariqa seriyada hisob tenglashdi – 1:1. Eslatib o‘tamiz, qaysi jamoa birinchi bo‘lib 3ta g‘alabaga erishsa, xokkey bo‘yicha birinchi O‘zbekiston chempioni degan sharafli nomga sazovor bo‘ladi.