Vazirlar Mahkamasining “O‘zbekiston Respublikasi hududida xizmat safarlari to‘g‘risidagi nizomni tasdiqlash haqida”gi qaroriga muvofiq, O‘zbekiston Respublikasi hududida xizmat safarini amalga oshirish bo‘yicha bir qator yangiliklar joriy etiladi.

Nizomda xodimlarni xizmat safariga yuborish tartibi;

xizmat safariga yuboriladigan xodimga xizmat safari bilan bog‘liq xarajatlarni qoplab berish;

xizmat safariga yuborilgan xodimlarning huquqlari va qonuniy manfaatlarini ta’minlash;

xizmat safariga ketayotgan va xizmat safaridan qaytayotgan shaxslarni ro‘yxatga olish bo‘yicha maxsus elektron jurnallar yuritish tartibi yo‘lga qo‘yiladi.

Xizmat safari xarajatlari hisobini yuritish bo‘yicha dasturiy ta’minot va uning mobil ilovasi ishlab chiqiladi.

Mobil ilova orqali xizmat safarida bo‘lgan xodimning transport, mehmonxona, ovqatlanish va boshqa xarajatlari xarid chekining fiskal belgisi matritsali shtrix kod (QR-kod) yordamida onlayn tarzda hisobga olinadi hamda xizmat safari xarajatlarini avtomatik ravishda hisoblash uchun “UzASBO” dasturiy majmuasiga uzatiladi.

Dasturiy ta’minotda xodimni xizmat safariga yuborish to‘g‘risidagi ma’lumotlar aks ettiriladi hamda xodimlar xizmat safariga yuborilganligi tasdiqlangandan so‘ng mehmonxona xarajatlari bo‘yicha mehmonxonalarga to‘lanadigan to‘lovlar pul o‘tkazish yo‘li bilan avtomatik ravishda o‘tkazib beriladi.

O‘zbekistan Respublikasi Turizm va madaniy meros vazirligi, Moliya vazirligi, Axborot texnologiyalari va kommunikatsiyalarini rivojlantirish vazirliklariga uch oy muddatda byudjet tashkilotlari hamda mehmonxonalar o‘rtasida Respublika hududida xizmat safariga yuborilgan xodimlarni turar joydan foydalanishga oid shartnomalarni rasmiylashtirish va to‘lovlarni amalga oshirish bo‘yicha elektron modul yaratish vazifasi yuklatilgan.

O‘zA