O‘zbekiston ham endi dunyoning gigant kompaniyalaridan biri hisoblangan "TCL" brendi va texnologiyasi asosida zamonaviy yangi avlod televizorlarini ishlab chiqarish imkoniyatiga ega bo‘ldi.

Artel kompaniyalar guruhi bilan tuzilgan kelishuvga asosan mazkur televizorlar endilikda “O‘zbekistonda ishlab chiqarilgan” yorlig‘i bilan xalqaro bozorlarga kirib boradi. 

Joriy yilning 2-3 may kunlari poytaxtimizda o‘tkazilgan III Toshkent xalqaro investitsiya forumi doirasidagi muzokaralar "O‘zeltexsanoat" uyushmasiga a’zo “Quality Device” va Xitoyning “TCL Overseas marketing LTD” kompaniyalari faoliyatida ham yangi bosqichni boshlab berdi. Ya’ni, ushbu forum doirasida tomonlar o‘rtasida anglashuv memorandumi imzolandi. 

Mazkur hujjatga asosan O‘zbekistonda "TCL" brendi va texnologiyasi asosida zamonaviy yangi avlod televizorlarini ishlab chiqarish ko‘zda tutilgan. 

Shuni alohida ta’kidlash kerakki, bunday kelishuvga erishishda davlatimiz rahbarining joriy yil 23-25 yanvar kunlari Xitoy Xalq Respublikasiga tashrifi mustahkam huquqiy asos bo‘lib xizmat qildi. O‘tgan davr mobaynida kompaniyalar vakillari turli uchrashuv va muzokaralar olib bordi. 

O‘zA muxbirlari forum doirasida imzolangan memorandum ijrosi asosida amalga oshirilayotgan ishlar bilan yaqindan tanishish maqsadida Toshkent viloyati Ohangaron tumanidagi Artel kompaniyalar guruhiga kiruvchi “Quality Device” korxonasida bo‘ldi. 

Unda korxona mas’ullari, ishchi-xodimlari va “TCL Overseas marketing LTD” kompaniyasi vakili bilan muloqot tashkil etilib, ushbu loyiha asosida olib borilayotgan ishlab chiqarish jarayonlari haqida ma’lumot berildi. 

“Quality Device” va “TCL Overseas marketing LTD” kompaniyalari mas’ullarining O‘zbekistonda "TCL" brendi va texnologiyasi asosida zamonaviy yangi avlod televizorlari ishlab chiqarilishi bo‘yicha dastlabki erishilgan natijalar haqidagi intervyusini O‘zAning YouTube kanalida ko‘rishingiz mumkin. 

<iframe width="650" height="420" src="https://www.youtube.com/embed/TgEP6UMmjxs" title="Xitoyning “TCL” brendi va texnologiyasi asosida yangi avlod televizorlari ishlab chiqarilmoqda" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Nasiba Ziyodullayeva, Doniyor Yoqubov, Anvarxo‘ja Ahmedov (video), O‘zA