Xitoyda an’anaviy nishonlanadigan Bahor bayrami mamlakatdagi eng yirik va muhim umumxalq bayrami hisoblanadi. Odatda u oy taqvimi bo‘yicha nishonlanib, bir necha kunlik dam olish, oilaviy uchrashuvlar, sayohatlar va ommaviy madaniy tadbirlar bilan kechadi.

Millionlab insonlar ishtirok etadigan ushbu ayyom nafaqat madaniy an’analarni namoyon etadi, balki mamlakat iqtisodiy faolligining o‘ziga xos ko‘rsatkichi sifatida ham baholanadi.

Yaqinda yakunlangan bayram kunlari Xitoyning iqtisodiy barqarorligi, ichki bozor salohiyati va texnologik taraqqiyotini yana bir bor ko‘rsatdi. Dam olish davrida hududlararo safar amalga oshirildi. Xitoy yangi yili muhitini his etish istagida bo‘lgan xorijiy mehmonlar oqimi ham sezilarli darajada oshdi. Bayram kunlarida kinoprokat tushumi 5,5 milliard yuandan ortiqni tashkil etdi.

Savdo markazlari va bozorlarda xaridlar faolligi yuqori bo‘ldi. Turizm va dam olish sohasida oflayn to‘lovlar hajmi o‘tgan yilga nisbatan 20 foizdan ortiq o‘sgani qayd etildi. Uzoq muddatli va individual sayohatlarga qiziqish ortdi, ichki turizm esa barqaror o‘sishni namoyon qildi. Ayrim xorijiy nashrlar Bahor bayramini “jahon iqtisodiyoti uchun katalizator” deya baholadi.

Bayram kunlari texnologik yutuqlar namoyishi bilan ham e’tiborli bo‘ldi. Yangi yil kechasida insonsimon robotlar ishtirok etgan sahna chiqishlari katta qiziqish uyg‘otdi. Sun’iy intellektga asoslangan xizmatlardan foydalanish ko‘lami oshdi. Ilg‘or texnologiyalar va an’anaviy bayram muhitining uyg‘unligi zamonaviy Xitoy qiyofasini namoyon etdi.

Bahor bayrami tobora xalqaro ahamiyat kasb etmoqda. Vizasiz tartib kengayishi natijasida “Yangi yilni Xitoyda kutib olish” xorijlik sayyohlar orasida ommalashmoqda. Chegaradan o‘tishlar soni o‘tgan yilga nisbatan oshgani, xorijiy sayyohlar mamlakatning madaniy merosi bilan yaqindan tanishgani qayd etildi.

Shu tariqa, Bahor bayrami nafaqat an’anaviy oilaviy ayyom, balki iqtisodiy faollik, texnologik taraqqiyot va ochiqlik siyosati samarasini namoyon etuvchi muhim davr sifatida ham namoyon bo‘ldi. Barqaror rivojlanayotgan Xitoy kelgusida ham jahon hamjamiyati bilan hamkorlikda izchil taraqqiyot yo‘lidan borishini bildirmoqda.

Nilufar Bozorova, O‘zA