Qoraqalpog‘iston Respublikasi Amudaryo tumanida “Uch avlod uchrashuvi” ma’naviy-ma’rifiy tadbiri bo‘lib o‘tdi.

Unda o‘zining bosib o‘tgan hayot yo‘li bilan ibrat bo‘lgan, yoshligi va bolaligi ikkinchi jahon urushi davrida o‘tgan front orti faxriylari, o‘zining mehnati bilan qadr topgan, davlatimizning ko‘plab mukofotlari bilan taqdirlangan nuroniylar va o‘rta avlod vakillari, o‘qishda, ishda hamda sportda katta yutuqlarga erishgan yoshlar qatnashdi.

Tadbirning birinchi qismi Olmazor mahallasidagi Xotira maydonida boshlandi. Ishtirokchilar dastlab Motamsaro ona monumenti poyiga gulchambarlar qo‘yib, tuman tarixi muzeyi bilan tanishdilar. Shu yerda umumta’lim maktablari tomonidan tayyorlangan millatlararo totuvlikni, ya’ni o‘zbek, qoraqalpoq, qozoq, turkman, rus, koreys millatlarining madaniyati, urf-odatlari, kuy-qo‘shiqlari, kiyinishi aks ettirilgan ko‘rgazma namoyish etildi. Mudofaaga ko‘maklashuvchi “Vatanparvar” tashkilotining sport-texnika klubi texnikalari va sportchilari faoliyati bilan tanishuv, Yoshlar ishlari agentligi tomonidan tumanning iqtidorli yoshlar vakillari, Zulfiya nomidagi davlat mukofoti sohibasi, “Yosh kitobxon oila” ko‘rik-tanlovi g‘oliblari, sport sohasida katta yutuqlarga erishgan sportchilar hamda baynalminal jangchilarning muloqotlari, fikr almashuvlari bo‘lib o‘tdi.

Tadbirning ikkinchi qismi “Gulzor” mahallasida davom etdi. Unda tuman hokimi S.Yo‘ldoshev, “Nuroniy” jamg‘armasi Qoraqalpog‘iston Respublikasi bo‘limi boshlig‘i T.Abdijabbarov ishtirokchilarni muborak Ramazon oyi bilan muborakbod etdi.  

Mahalla va nuroniylarni qo‘llab-quvvatlash bo‘limi hamda madaniyat bo‘limi tomonidan tashkil etilgan “Bir piyola choy ustida” davom etgan tadbirda nuroniylar, mahalla faollari, deputat, ibratli o‘rta avlod hamda yoshlar vakillari yurtimiz tinchligini, aholi farovonligini ta’minlash, millatlararo do‘stlikni mustaxkamlash, jinoyatchilikning oldini olish, har qanday illatlardan saqlanish borasida fikr-mulohazalarini bildirdi.

Tumanning taniqli insonlari va ularning faoliyati haqidagi videoroliklar, san’at ustalarining konsert dasturi namoyish etildi.  

Tadbirda bir guruh mehnat faxriylariga, front orti faxriylariga, yakka-yolg‘iz va ijtimoiy himoyaga muhtoj keksa avlod vakillariga “Nuroniy” jamg‘armasi Qoraqalpog‘iston Respublikasi bo‘limi hamda tuman hokimligi tomonidan tayyorlangan pul mukofoti va esdalik sovg‘alar topshirildi.  

Dovud ABIBULLAEV, O‘zA muxbiri