O‘zbekiston davlat jismoniy tarbiya va sport universitetida Xalqaro havaskor boks assotsiatsiyasi Prezidenti Umar Kremlyov boshchiligidagi delegatsiya vakillari mehmon bo‘ldi.

Dastlab delegatsiya vakillari oliygoh rektori Mahmudjon Boltabayev boshchiligidagi rahbariyat jamoasi tomonidan tantanali kutib olindi. Ular ishtirokida universitet Olimpiya bog‘ida O‘zbekistonda xizmat ko‘rsatgan murabbiy, sport ustasi, hakam, boks bo‘yicha og‘ir vazn toifasida ikki karra mamlakat chempioni Andrey Borzenko haykalini yasash uchun tamal toshi qo‘yish marosimi bo‘lib o‘tdi.  Unda delegatsiya rahbari U.Kremlyov universitet talabalariga o‘zining esdalik sovg‘alarini ulashdi. Oliygohning sport inshootlarida talaba-yoshlarga yaratilgan sharoitlar bilan tanishdi.

Shundan so‘ng delegatsiya vakillari hamda universitet rahbariyati, professor-o‘qituvchilar, Andrey Borzenkoning oila a’zolari va talaba-yoshlar o‘rtasida davra suhbati tashkil etildi. Unda o‘zbek boksining rivojlanish tarixi va jahon hamjamiyatida tutgan o‘rni, yurtimiz bokschilarining bugungi kunda erishayotgan g‘alabalari yuzasidan fikr almashildi. Shuningdek, Umar Kremlyovga O‘zbekiston davlat jismoniy tarbiya va sport universitetining faxriy professor unvoni berildi. Mehmonlarga Andrey Borzenko haqidagi hujjatli film namoyish etildi.

 A.Musayev,

O‘zA.