Andijon shahridagi Yoshlar markazida «TechnovationGirls» xalqaro dasturida faol ishtirok etgan qizlarni taqdirlashga bag‘ishlangan tadbir bo‘lib o‘tdi.

O‘zbekiston Respublikasi Yoshlar ishlari agentligi hamda BMT hamkorligida yosh qizlarning axborot texnologiyalari bo‘yicha bilim va ko‘nikmalarini rivojlantirishga ko‘maklashish, ular orasida STEM sohasini targ‘ib qilish, gender tengligini mustahkamlash, mazkur yo‘nalishda ayol va qizlarning imkoniyatlarini kengaytirish, bu borada ularga sifatli ta’lim berish, shuningdek, STEMda ayollar va qizlar jamiyatini yaratish orqali mintaqada yangi-yangi innovatsion g‘oyalarni kashf etish, imkoniyatlarni kengaytirish maqsadida «Farg‘ona vodiysi yoshlarining ijtimoiy uyg‘unligi» qo‘shma loyihasi amalga oshirilmoqda.  

[gallery-954]

Mazkur loyiha doirasida Andijon, Namangan va Farg‘ona viloyatida yashovchi qizlar va ularning ustozlari (mentorlari) uchun «TechnovationGirls» xalqaro dasturi bo‘yicha bir necha oy davomida har haftalik bepul onlayn treninglar o‘tkazildi.

Tadbirda mazkur onlayn dasturda faol ishtirok etgan bir guruh andijonlik qizlar maxsus sertifikat va esdalik sovg‘alar bilan taqdirlandi.  

- Mamlakatimiz yoshlari uchun yangi soha hisoblangan STEM sohasini rivojlantirish bo‘yicha o‘tkazilgan onlayn treninglarda andijonlik qizlar ham faol ishtirok etdi, – deydi Andijon davlat tibbiyot instituti talabasi Mehribonu Ahmadjonova. – Trening mashg‘ulotlarida malakali mutaxassislar ko‘magida STEM sohasidagi bilim va malakalarimizni boyitdik. Olgan bilimlarimiz bizning kelgusidagi faoliyatimizda shubhasiz, yordam beradi.  

F. UBAYDULLAEV,

Z. UMRZOQOV (surati), O‘zA