Айни кунларда Саудия Арабистонининг Ар-Риёд шаҳрида Бутунжаҳон жанговар спорт ўйинларининг навбатдаги мусобақалари ўтказилмоқда. 120 дан зиёд давлатдан 1600 нафарга яқин спортчи иштирок этаётган III Бутунжаҳон жанговар спорт ўйинларида мамлакатимиз спортчилари 8 та спорт турида ватанимиз шарафини ҳимоя қилмоқда.

Бугунгача “World combat games” ўйинларида бир қатор спорт турлари бўйича мусобақалар поёнига етди. Якунланган самбо мусобақаларида ҳамюртларимиз 2 та олтин, 3 та кумуш, 1 та бронза медалига эга чиққан ҳолда Ўзбекистон спорт делегациясининг умумий медаллари сони 6 тага етишини таъминлади.

Кеча шунингдек, бокс, каратэ, ушу, сумо спорт турларидаги бир қатор йўналишларда баҳслар якунланди.

Бугун, 22 октябрь куни ўйинлар доирасида ўтаётган ушу баҳсларида терма жамоамиз аъзоси Даря Латишева медаллар учун курашга киришади.

Ортда қолган мусобақалар сарҳисобига кўра, мустақил спортчилар жамоаси сифатида қатнашаётган жамоа 7 та олтин, 3 та кумуш ва 2 та бронза медали билан 120 дан зиёд давлат жамоалари орасида етакчилик қилмоқда. Улардан кейинги ўринда бораётган Украина жамоаси 6 та олтин, 3 та кумуш медалга, Саудия Арабистони 3 та олтин, 6 та кумуш, 4 та бронза медалига, Баҳрайн 3 та олтин, 1 тадан кумуш-бронза билан 4-ўриндан жой олган.

Ўзбекистон спорт делегацияси 6 та медаллар жамланмаси билан умумжамоа рўйхатида 5-ўринни эгаллаб турибди.

Эслатиб ўтамиз, 30 октябрга қадар давом этадиган “World combat games” ўйинларида Ўзбекистоннинг 44 нафар спортчиси 8 та спорт турида қатнашмоқда. Бу галги комплекс мусобақалар 16 спорт турининг 25 га яқин йўналишларида ўтказилмоқда.

Т. Рўзиев, ЎзА