Samarqand shahrida mukofot jamg‘armasi 50 ming AQSH dollarini tashkil etgan ayollar o‘rtasidagi “Women’s Chess Championship” xalqaro turniri o‘z nihoyasiga yetdi.

14 davlatning 150 nafarga yaqin shaxmatchi xotin-qizlari bosh sovrin uchun kurashgan turnirda FIDE reytingida 1800 dan yuqori bo‘lganlar “A” guruhda, reytingi 2000 va undan past darajadagilar “B” guruhda dona surdi.

Kecha xalqaro turnirning 9-tur o‘yinlari bo‘lib o‘tdi. “A” guruhida yetakchilikka asosiy da’vogarlar Shuvalova - Shuxman va Bodnaruk - Slivichka uchrashuvlari ko‘pchilikning diqqat-e’tiborida bo‘ldi.

Birinchi juftlik bahsida murosa yo‘li tanlangan bo‘lsa, ikkinchi juftlik qarama-qarshiligidagi o‘yinda polshalik Alisya Slivichka qora donalarda harakatlanishiga qaramasdan raqibini taslim etishga erishdi. Aynan ushbu g‘alaba Slivichka turnirdagi umumiy ochkolari soni 7,5 taga yetishini va kuchlilar kurashida 1-o‘rinni qo‘lga kiritishini ta’minladi.

Sovrinli o‘rinlar shuningdek, 7 ochkoli Anna Shuxman, 6,5 ochkoli Polina Shuvalovaga nasib etdi.

Hamyurtimiz Umida Omonova so‘nggi turda iqtidorli yosh shaxmatchimiz Guldona Karimovani dog‘da qoldirgan holda 6,5 ochko bilan qo‘shimcha ko‘rsatkichlarga ko‘ra, 5-pog‘onadan joy oldi.

Terma jamoamiz a’zolaridan Guldona Karimova va Afruza Hamdamova 5,5 ochko bilan 11-12-o‘rinlarni, Nilufar Yoqubboyeva 5,5 ochko bilan 16-o‘rinni band etdi.

Xalqaro turnirning “B” guruhida 80 nafar xotin-qiz dona so‘rgan bo‘lsa, ular orasida O‘zbekiston terma jamoasi a’zolaridan Maftuna Mamatqulova 8 ochko bilan g‘oliblikni qo‘lga kiritdi.  

Robiyaxon Sardorova 7,5 ochko bilan 2-o‘rinni, 7 ochkoli Shahina Ahmedova 3-o‘rinni egalladi. Shuningdek, 6,5 ochko jamg‘argan iqtidorli shaxmatchi-qizlarimizdan Malika Jumayeva, Aziza Tursunova, Gulxumor Najmitdinova, Mohinur Hikmatxonova kabi yoshlarimiz kuchli o‘nlikni band etishdi.

T.Ro‘ziyev,

O‘zA