Маълумки, интернет тармоқларида википедия кўп тилли, эркин, интернет энциклопедияси ҳисобланиб, у кўнгиллилар жамоаси томонидан очиқ ҳамкорлик асосида юритилади.

Википедия бугунга келиб, энг катта ва энг кўп мурожаат қилинадиган маълумотлар манбасига айланган. Маълумот жойлашнинг афзалликларидан бири ахборотнинг барча тилларга уланишидир. Бу борада “WikiStipendiya” лойиҳаси самарали кўмак беради. Шунга кўра, Ёшлар ишлари агентлигининг “WikiStipendiya” лойиҳаси жамоаси томонидан “Водий ойлиги” доирасида википедияга қизиқувчи ёшлар билан учрашувлар ўтказилмоқда.

Хусусан, “Водий ойлиги” – википедия мақолаларини таҳрирлаш ҳамда энциклопедик аҳамиятга эга бўлган мавзуларда янги мақолалар яратишга қаратилган лойиҳа бўлиб, июнь ойида Наманган, Фарғона ва Андижон вилоятига оид маълумотлар киритилиши белгиланган. Ушбу ойликда энг яхши натижага эришган фойдаланувчи 10 миллион сўм пул мукофотини қўлга киритади. Иккинчи ўрин эгаси 5 миллион сўм ҳамда учинчи ўриндаги иштирокчи эса 3 миллион сўм пул мукофотини қўлга киритиши мумкин.

“WikiStipendiya” лойиҳаси жамоаси дастлаб Наманган давлат университетида, ундан сўнг “Wiki-tur” аъзолари Давлатобод туманида жойлашган, 70 минг китоб сақланадиган кутубхонада ва Наманган шаҳридаги Президент мактабида википедияга қизиқувчи ёшлар билан учрашди. Унда ёшларга википедия ҳақида тушунчалар берилди.  

Гулноза Бобоева, ЎзА