Бутунжаҳон бокс кенгаши (WBC) томонидан эълон қилинган янгиланган рейтингда ўзбекистонлик саккиз нафар чарм қўлқоп устасининг номи келтирилди.

Жумладан, энг оғир вазн тоифасида ўз истеъдодини намойиш этиб келаётган Баҳодир Жалолов 11-поғонадан 10-ўринга кўтарилгани қайд этилди.

Энг ўрта вазнда ўзига хос бокс санъати билан халқаро майдонда ном қозонган Бектемир Мелиқўзиев уч поғона юқорилаши ортидан 7-ўринни банд этди.

Профессионал бокснинг икки йўналишида жаҳон чемпионлигига эришган Муроджон Аҳмадалиев WBC рейтингидаги кўрсаткичини 12-қатордан 10-ўринга яхшилашга эришди. 

Отабек Холматов эса 9-ўриндан 10-қаторга пасайган бўлса, энг оғир вазн тоифасида эндигина профессионал боксда фаолиятини бошлаган Лазизбек Муллажонов ҳам кўриниш берди. Муллажонов номи 32-қаторда келтирилди.

Т.Рўзиев, ЎзА