“Voyage Awards 2025” xalqaro mukofoti doirasida O‘zbekiston “Madaniy turizm bo‘yicha yil yo‘nalishi” nominatsiyasida g‘olib deb topildi.

Mukofot xalqaro maydonda milliy turizm salohiyatini faol ilgari surgani uchun O‘zbekiston Respublikasi Turizm qo‘mitasiga topshirildi. Mutaxassislar  Buyuk ipak yo‘li bilan bog‘liq  yo‘nalishlarning o‘ziga xosligi, mamlakatimizning tarixiy yodgorliklari va madaniy an’analarini alohida qayd etdi. 

“Voyage Awards” mukofoti nufuzli xalqaro tuzilmalar va soha vakillari tomonidan turizm yo‘nalishlari, mehmonxona tarmoqlari, aviakompaniyalar va sayyohlik tashkilotlarini baholash asosida beriladi. O‘zbekistonning ushbu nominatsiyada g‘olib deb topilishi jahon turizm hamjamiyatining yurtimizga,  xususan  Samarqand, Buxoro, Xiva kabi tarixiy shaharlarga bo‘lgan qiziqishi ortib borayotganini ko‘rsatadi. 

Mutaxassislarning fikricha,  mukofot mamlakatimizda  turizm sohasini rivojlantirish,  xalqaro  hamkorlikni kengaytirish va  sayyohlik infratuzilmasini takomillashtirishga qaratilgan izchil siyosatning natijasidir. 

Aziza Alimova, O‘zA