Келгуси йили пойтахтимизда волейбол бўйича ёшлар ўртасида жаҳон чемпионати баҳслари бўлиб ўтади. Бундан ташқари, Халқаро волейбол федерацияси билан ҳамкорликда юртимизда бир қатор волейбол турнирларини ташкил этиш назарда тутилганки, айни ҳаракатлар 2028 йилги Олимпия ўйинларига тайёргарликнинг муҳим босқичи саналади.

Ўзбекистон волейбол федерациясида Миллий олимпия қўмитаси раҳбарияти иштирокида ўтказилган тақдимот маросимида шу ҳақда сўз борди.

Мамлакат волейболчиларининг яқин 4 йиллик режаларига бағишланган тадбирда энг аввало, жамоаларнинг моддий техник базасини мустаҳкамлаш, спорт инвентарлари билан таъминлаш, минтақавий мусобақаларда тажриба ошириш кўзда тутилгани билдириб ўтилди.

Таъкидланганидек, ҳозиргача Олимпия ўйинларининг волейбол баҳсларида 12 тадан миллий терма жамоа иштирок этиб келган бўлса, "Лос-Анжелес-2028" ёзги Олимпия ўйинларида жамоалар сони 16 тага ортиши кутилмоқда. Ўзбекистон эркаклар терма жамоасида тўрт йиллик ўйинларнинг йўлланмаларини қўлга киритиш имконияти мавжуд эканлиги хусусида фикр юритилди.

Федерация масъуллари 2025 йили пойтахтимизда ёшлар ўртасида ўтадиган жаҳон чемпионати Олимпия ўйинларига тайёргарлик кўрадиган таркибни аниқлаб олишга зарур шарт-шароитларни яратиши билан аҳамиятли эканлигига эътибор қаратди.

Т.Рўзиев, ЎзА