Таиланднинг Накхонпатхом шаҳрида саккиз кун давом этган волейбол бўйича 18 ёшгача бўлган қизлар ўртасидаги 14-Осиё чемпионати баҳслари якунланди.

Осиёнинг 11 давлати терма жамоалари икки гуруҳга бўлинган ҳолда совринли ўринлар учун кураш олиб борган мусобақада Ўзбекистоннинг волейболчи қизлари 2018 йилги натижаларини бир оз яхшилаб олди. Мазкур қитъа чемпионатида иккинчи бор қатнашаётган ҳамюртларимиз бу гал 8-ўринни эгаллади. 2018 йилги қитъа чемпионатида ҳамюртларимиз 10-ўриндан жой олганди. 

Бевосита баҳслар ҳақида сўз юритадиган бўлсак, Япония 14-Осиё чемпионати финалида Хитой устидан тай-брейкда ғалабага эришиб, тўққизинчи бор Осиёнинг энг кучли жамоаси эканлигини намойиш этди. Хитойга қарши кечган финалдаги шиддатли ўйинда 3:2 ҳисоби қайд этилди. Айтиш лозим, японлар 1997, 2007, 2008, 2010, 2012, 2014, 2017 ва 2018 йиллари чемпионлик шоҳсупасига кўтарилган. 

Жанубий Корея терма жамоаси плей-офф босқичининг беш сетли ҳаяжонли ўйинида Таиландни 3:2 ҳисобида мағлуб этиб, 3-ўрин учун кечган баҳсда бронза медалини қўлга киритди. Ушбу учрашувда Таиланднинг мезбонлиги ҳам ёрдам бера олмади ва улар 4-ўрин билан кифояланишди. 

Шу тарзда, 19 ёшгача бўлган аёллар ўртасидаги Жаҳон чемпионати йўлланмалари Япония, Хитой, Жанубий Корея ва Таиланд жамоаларига насиб этди. 

5-6-ўринлар учун кечган курашда Хитой Тайпейи Қозоғистонни ортда қолдириб 5-ўринни, қозоғистонликлар ўз-ўзидан 6-ўриндан жой олди. 

Айтиб ўтганимиздек, ҳамюртларимиз 7-8-ўринлар учун Эрон вакилаларига рўбарў келди. Биринчи сетда Ўзбекистон терма жамоаси 26:24 ҳисобида устунликка эга бўлди. Қолган уч сетда эса омад вакилларимиздан юз ўгирди ҳамда якунда 3:1 ҳисоби билан эронликлар 7-ўринни, волейболчи қизларимиз 8-ўринни эгаллади. 

9-10 ўринлар учун Филиппин-Ҳиндистон жамоалари ўртасидаги учрашувда филиппинликларнинг қўли баланд келди. 14-Осиё чемпионати давомида биронта ҳам учрашувда зафар қуча олмаган Австралия 11-ўрин билан чекланди. 

Тўлқин Рўзиев,  ЎзА