Халқаро волейбол федерацияси келгуси йили 19 ва 21 ёшгача бўлган жамоалар ўртасида ўтадиган жаҳон чемпионатларини қабул қиладиган мамлакатлар рўйхати ва мусобақалар санасини маълум қилди.

Унга кўра, 2025 йил 19 ёшгача бўлган қизлар жамоалари ўртасидаги жаҳон чемпионати 3-13 июль кунлари Хорватия ва Сербия давлатларида ташкил этилса, 19 ёшгача бўлган йигитлар ўртасидаги жаҳон чемпионатига пойтахтимиз Тошкент мезбонлик қилади. 

Мамлакатимизда ташкил этиладиган жаҳон чемпионати баҳслари 24 июль - 3 август кунлари бўлиб ўтиши белгиланди. 

Пойтахтимиз мезбонлигида кечадиган жаҳон чемпионати баҳсларида 24 та жамоа иштирок этади. Қуръа ташлаш маросими жорий йилнинг 24 декабрида бўлиб ўтади. 

Халқаро волейбол федерацияси маълумотига кўра, 21 ёшгача бўлган аёллар жамоалари ўртасидаги жаҳон чемпионати келгуси йилнинг 7-17 август кунлари Индонезияда, ушбу ёш тоифасидаги эркаклар жамоалари ўртасидаги дунё биринчилиги эса 18-31 август кунлари Хитойда ташкил этилиши назарда тутилган. 

Т.Рўзиев, ЎзА