Бугун, 28 июль куни мамлакатимизда волейбол бўйича U-19 эркаклар миллий терма жамоалари ўртасида давом этаётган жаҳон чемпионатининг гуруҳ босқич ўйинлари бўлиб ўтади.

Тошкентдаги “Юнусобод“ спорт саройи ҳамда Ўзбекистон давлат жисмоний тарбия ва спорт университети мажмуасида ташкил этилаётган ўйинларда тўртта гуруҳда 16 та ўйин ўтказилади.

Ўзбекистон U-19 терма жамоаси “А” гуруҳида навбатдаги баҳсини Аргентина жамоасига қарши ўтказса, Бельгия Туркия билан, Покистон жамоаси Пуэрто-Рико вакиллари билан рўбарў келади.

“Б” гуруҳида 9 очко билан пешқадамлик қилаётган Болгария Канада жамоаси қаршилигини енгишга ҳаракат қилади. Шунингдек, бу гуруҳда Франция – Япония ва Хитой – Жазоир жамоалари ўйинларига гувоҳ бўламиз.

“С” гуруҳи карвонбошиси Испания 3-тур доирасида Мисрни 3:0 ҳисобида мағлуб этган Италия билан куч синашади. Ушбу гуруҳдаги Эрон – Миср, Тунис – Польша “дуэл”лари ҳам гуруҳнинг асосий баҳслари сифатида кўпнинг кузатувида бўлиши шубҳасиз.

“Д” гуруҳида тўртинчи кунги ўйинлар энг кульминацион нуқтага келганини англатмоқда. Боиси, ўтган 3 та ўйинда рақибларини мағлуб этиб келган Жанубий Корея ва Финляндия айнан бугун тўқнаш келаётгани эътиборли. Ушбу жамоалар ушбу турда куч синашиши гуруҳда етакчилик айнан қайси жамоага тегишли эканини белгилаб бериши билан аҳамиятли.

Бевосита чемпионатда қатнашаётган волейболчилар хусусида сўз юритсак, Испания жамоасининг муваффақиятига беқиёс ҳисса қўшиб келаётган Сезар Ираче ортда қолган уч кунлик мусобақалар сарҳисобига кўра жаҳон чемпионатининг энг яхши тўпурарига айланиб олди. 85 очко жамғарган 17 ёшли волейболчи биринчи кундаёқ 39 очко жамғарди ва шундан бери учта ўйинда 77 та ҳужум очкоси, учта блок ва бешта хизмат ўйинини қайд этди.

Шунингдек, истеъдодли ёш волейболчилар Банг Кан Хо ва Ли Жун Хо (Жанубий Корея), Муҳаммад Сауд ва Муҳаммад Яҳё (Покистон), Демир Узунжа(Туркия), Гилем Хуберт ва Яннес Строббе(Бельгия), Самуел Гуиди Корреа (Аргентина), Шаҳбоз Мамаюсупов ва Элмурод Мамадалиев (Ўзбекистон) сингари ёшлар ўз истеъдодини намойиш этиш ортидан волейбол клублари назарига тушмоқда.

Эслатиб ўтамиз, жаҳон чемпионатининг гуруҳ босқич мусобақалари 29 июлга қадар давом этади. Чемпионатнинг плей-офф ўйинлари 30 июль - 3 август, ярим финал ва финал баҳслари 3 август куни ташкил этилади.

Тўлқин Рўзиев,

ЎзА