Чирчиқ олимпия ва паралимпия спорт турларига тайёрлаш маркази ҳамда Чирчиқ давлат педагогика университети спорт залларида волейбол бўйича 16-21 ва 22-26 ёш тоифасидаги хотин-қизлар ўртасида ўтказилган “Ички ишлар вазири кубоги” “С” лигаси республика финал беллашувларида Қашқадарё вилояти Муборак тумани “Сариқ” ва Тошкент вилояти Ўртачирчиқ тумани “Файзобод” жамоалари ғолибликни қўлга киритди.

16-21 ёш тоифасидаги қизлар ўртасида биринчи ўринни Қашқадарё вилоятининг Муборак туманидаги “Сариқ” маҳалла фуқаролар йиғини жамоаси эгаллаган бўлса, совринли ўринлар Тошкент вилояти Оҳангарон шаҳридаги “Ёшлик” ва Самарқанд вилояти Ургут туманининг “Сариқтепа” жамоаларига насиб этди.  

22-26 ёш тоифасидаги хотин-қизлар ўртасидаги беллашувларда фахрли биринчи ўринни Тошкент вилояти Ўртачирчиқ тумани “Файзобод” маҳалла фуқаролар йиғини жамоаси, иккинчи ўринни Андижон вилояти Марҳамат тумани “Дурафшон”, учинчи ўринни Қорақалпоғистон Республикаси Мўйноқ тумани “Жайхун” маҳалла фуқаролар йиғини жамоаси эгаллади.  

Беллашувлар якунида ғолиб ва совриндорлар Тошкент вилояти ёшлар сиёсати ва спорт бошқармаси томонидан диплом, медаль, кубок ва қимматбаҳо эсдалик совғалари билан тақдирланди.  

Беллашувлар доирасида Чирчиқ олимпия ва паралимпия спорт турларига тайёрлаш маркази ҳудудида “Яшил макон” лойиҳаси асосида мевали ва манзарали дарахт кўчатлари экилиб, “Беш ташаббус олимпиадаси” боғи яратилди.  

Т. Рўзиев, ЎзА