Филиппиннинг Пасай шаҳрида волейбол бўйича жаҳон чемпионатининг чорак финал босқичида иштирок этадиган 8 та терма жамоа номи аниқ бўлди.

Аниқроқ айтадиган бўлсак, чемпионатнинг 1/8 финали сўнгги баҳсларида Болгария 3-0 ҳисобида Португалияни таслим этди. АҚШ ва Словения ўртасидаги ўйин 3-1 ҳисобида якунланди. Шунингдек, Тунис – Чехия 0-3, Сербия – Эрон 2-3 натижалари қайд этилди.

Шу тариқа, чемпионатнинг 1/4 финалида бугун, 24 сентябрь куни Италия – Бельгия, Польша – Туркия термалари баҳси ташкил этилса, эртага Чехия – Эрон ва АҚШ – Болгария терма жамоалар ўзаро рақобатлашади.

Эслатиб ўтамиз, жаҳон чемпионатининг ярим финал баҳслари 27 сентябрь куни ташкил этилади. Финал ва ярим финал баҳслари эса 28 сентябрь кунига қадар давом этади.

Жавоҳир Тошхўжаев,

ЎзА