Өзбекстан Республикасының Сыртқы істер министрі Владимир Норов ЕҚЫҰ Сыртқы істер министрлері кеңесінің отырысында сөйлеген сөзінде Орталық Азия өңірінің тұрақты дамуы мен қауіпсіздігінің болашағы көрші Ауғанстанда бейбітшілікті қамтамасыз етумен тығыз байланысты екенін атап өтті.

«Халықаралық қоғамдастықтың басым міндеттері Ауғанстандағы адам өлімінің алдын алу, ел экономикасын қалпына келтіру және өңірлік сауда-экономикалық қатынастарға интеграциялау, осы елде маңызды инфрақұрылымдық және әлеуметтік жобаларды жүзеге асыру», деді В.Норов.

Өзбекстан СІМ басшысы жиынға қатысушылардың назарын Өзбекстанның Ауғанстанға әлеуметтік-экономикалық сауықтыру және гуманитарлық көмек көрсетуге бағытталған күш-жігеріне аударды. «Термез – Мазари Шариф – Қабул – Пешавар» стратегиялық маңызды жобасын жүзеге асыру Орталық және Оңтүстік Азия арасындағы өзара тәуелділікті нығайтып, Ауғанстанды экономикалық ынтымақтастыққа тартуға және оны осы екі аймақты байланыстыратын көпірге айналдыруға үлкен мүмкіндіктер ашады.

Владимир Норов ЕҚЫҰ серіктестерін қиын жағдайда қалған ауған халқына гуманитарлық көмек көрсету үшін Термез қаласындағы Халықаралық көлік-логистикалық хабты пайдалануға, сондай-ақ Ауғанстан экономикасы үшін мамандарды даярлау үшін Термезде Білім кластерін құруға қолдау көрсетуге шақырды.