Өзбекстан Республикасының Сыртқы істер министрі Владимир Норов Нью-Йоркте АҚШ Мемлекеттік департаментінің Ауғанстан бойынша арнайы өкілі Томас Вест және АҚШ-тың Ауғанстан қыз-келіншектері және адам құқықтары жөніндегі арнайы өкілі Рина Амириймен келіссөздер жүргізді.

СІМ мәліметінше, кездесу барысында Ауғанстанда ұзақ мерзімді бейбітшілікке қол жеткізу, ел экономикасын қалпына келтіру, ондағы күрделі әлеуметтік-гуманитарлық жағдайды шешуге көмектесу жөніндегі ынтымақтастықты одан әрі кеңейту перспективалары талқыланды.

АҚШ-тың арнайы өкілдері 2022 жылдың шілде айында Ташкентте өткен Ауғанстан бойынша халықаралық конференция осы елдегі жағдайды шешуге әлемдік қауымдастықтың дәйекті көзқарасын әзірлеу үшін тиімді тұғырнама жасағанын атап өтті. 

Ауғанстан халқын қолдау бойынша халықаралық күш-жігерді жандандыру және жүйелеу қажеттілігіне ерекше назар аударылды. Осы тұрғыда Ауғанстанға гуманитарлық көмек жеткізу үшін Термез қаласында құрылған көп функционалды көлік-логистикалық хабты тиімді пайдаланудың маңыздылығы сөз болды.