Өзбекстан Республикасы Сыртқы істер министрінің міндетін атқарушы Владимир Норов ресми сапармен келген АҚШ Мемлекеттік хатшысының Оңтүстік және Орталық Азия істері жөніндегі көмекшісі Дональд Лумен кездесті.

Тараптар түрлі салалардағы Өзбекстан – АҚШ қарым-қатынастарының қазіргі жағдайы мен болашағын талқылады.

Америкалық тарап Өзбекстанда Президент Шавкат Мирзияевтің басшылығымен болып жатқан өзгерістерге, сондай-ақ елдің практикалық және ашық сыртқы саясатын жоғары бағалады. АҚШ үкіметінің Өзбекстандағы реформаларды белсенді түрде қолдауға дайын екендігі айтылды.

Соңғы жылдары саяси диалогтың жанданып келе жатқаны атап өтілді. Жыл сайынғы консультациялар тетігін Стратегиялық әріптестік диалогына айналдыру туралы шешім және қарым-қатынастар тарихындағы маңызды оқиға ретінде 2021 жылы Ташкентте бірінші кездесудің сәтті өтуі тараптардың ынтымақтастықты жан-жақты дамытуға дайын екенін көрсетті.

Вашингтонда өтетін Стратегиялық әріптестік диалогының келесі сессиясына тыңғылықты дайындалып, сарапшылар деңгейінде салалық кездесулер өткізу маңызды екені сөз болды.

Өзбекстан мен АҚШ инфрақұрылым, энергетика, көлік, қоршаған ортаны қорғау және климаттың өзгеруі салаларында нақты нәтижелерге қол жеткізу үшін «С5+1» форматындағы ынтымақтастықты жалғастыруға мүдделі екені атап өтілді.

Сондай-ақ өңірлік және халықаралық мәселелер бойынша пікір алмасылды. Өзбекстанның Ауғанстанға гуманитарлық көмек көрсету, бұл елде ұзақ мерзімді бейбітшілік орнату және елдің экономикасын қалпына келтіруге көмектесетін жобаларды ілгерілету әрекеттері жоғары бағаланды.