Собиқ конгрессмен, собиқ губернатор. Президент Доналд Трамп қандай муаммолар билан юзлашмасин, унинг олдида туради, содиқ муовин.

Трамп уни вице-президентликка танлаганида республикачилар ҳайрон бўлмаган. Босиқ ва сабр-қаноатли Пенс бу лавозим учун айни одам, дея олқишлашган. Ҳозир ҳам қувватлов кучли.

Пенс Трамп суянадиган тоғ, дейди тарихчи-таҳлилчи Жол Голдштейн.

“Пенс президентнинг маслаҳатчиси. Конгресс билан яқиндан ишлайди. Дипломатлик ҳам қилади".

Коронавирус тарқалар экан, Пенс унга қарши кураш комиссиясига раислик қилди. Трамп маъмурият нимаики чора кўрса-кўрмаса, Пенс уни тушунтирди. Энг оғир саволларга у жавоб беришга уринди.

“Мактабларни қайта оча оламиз. Болалар хавф остида эмас", деди Пенс.

АҚШда вице-президентлар ҳар доим ҳам бу қадар фаол бўлмаган. Жон Кеннеди президентлигида Линдон Жонсон жонбозлик кўрсатган. Охирги бир неча ўн йилликда вице-президентларнинг роли ошди.

«Вице-президентлик лавозимининг аҳамияти Картер-Мондейл Оқ уйда бўлган даврда кучайди», дейди Голдштейн.

Яъни 1970 йиллар охири 1980 йилларнинг бошида. Вольтер Мондейл Президент Жимми Картернинг суянган тоғи бўлган. Ундан кейинги вице-президентлар, ҳар икки партиядан ҳам, шу йўлдан борди. Яқин маслаҳатчи, фаол.

Дик Чейни вице-президент сифатида Президент Жорж Бушнинг ҳар бир қарори ортида турди, дейди таҳлилчилар, ҳам ташқи ҳам ички сиёсатда.

"Трамп Дик Чейни сингари вице-президенти бўлишини асло хоҳламади. Пенс президент истаган масалалар устида ишлайди, у берган вазифаларни бажаради. Трамп ҳокимиятда бир ўзи бўлишини, вице-президент унинг изнидан чиқмаслигини истайди”, дейди Реб Браунелл.

Диндор Пенс ўзи сингари консерватив америкаликларни Трамп таъсири остида ушлаб турибди.

Пенс Трампнинг иммиграцион сиёсатини тарғиб қилиб келмоқда. Энг юқори лавозимларга содиқ инсонлар келишини таъминламоқда. Россияга нисбатан Трампга қараганда кескинроқ муносабатда, лекин бунинг таъсири сезилмайди. Аёлларга нисбатан ёндашувда ҳам президентдан фарқ қилади.

Лекин таҳлилчилар бу масалада ҳам унинг таъсирини кўрмайди.

«Пенс кучли вице-президент эмас. Ўзига хос жиҳатлари билан ажралиб тургани йўқ. Президент нима деса, шуни қилади», дейди Голдштейн.

Айрим таҳлилчиларга кўра, Пенс норозилик намойишларида қуролли кучлар сафарбар этилмаслиги учун ҳаракат қилган. Пенс, улар назарида, куч ишлатишга эҳтиёткорлик билан ёндашади.

Вице-президент парда ортида ҳам омма олдидагидек итоаткор ва босиқми? Агар шундай бўлса, унинг таъсирини юқори деб баҳолай олмаймиз, дейди сиёсатдонлар. Трамп унинг ўрнига бошқасини танламагани Пенсдан миннатдор эканини англатади.