Гулистон шаҳридаги “Билимдонлар масканида” тантанали тадбир бўлиб ўтди.

Унда Сирдарё вилояти ҳокими Ғофуржон Мирзаев, Ўзбекистон велосипед спорти федерацияси вилоят бўлими мутасаддилари ва ёш велосипедчилар иштирок этди.
Вилоят раҳбари спортчилар билан самимий суҳбатлашиш баробарида ўз фикр ва тавсияларини берди. Уларнинг орзу-умидлари, мақсадлари билан қизиқди. 

Президентимиз ташаббуси билан велоспортни янада ривожлантириш, айниқса, ёшларни ушбу спорт турига кенг жалб этиш ҳамда шу орқали мамлакатимизда соғлом турмуш тарзини тарғиб қилишга алоҳида эътибор қаратилаётганини таъкидлади. 

Спортчиларнинг Олимпия ва Паралимпия, Осиё ва Параосиё ўйинларида, Жаҳон чемпионатларида ва бошқа йирик халқаро мусобақаларда муносиб иштирок этиб юқори натижаларга эришишига кўмаклашиш мақсадида 14 дона янги, замонавий велосипед совға қилинди. Шунингдек, велоспорт федерацияси вилоят бўлими фаолиятини янада ривожлантириш, моддий-техник базасини мустаҳкамлаш учун "Damas" автомобили ҳам тантанали равишда топширилди. 

– Вилоятимизда спортнинг, шу жумладан, велоспортнинг оммалашиши ва ривожланиши учун барча имкониятлар яратиб берилмоқда. Бундай эътибор спортчиларимизга янада куч беради. Билдирилаётган ишончни амалдаги натижаларимиз билан оқлашга бутун куч-ғайратимизни сарфлаймиз – деди федерациянинг Сирдарё вилояти бўлими бошлиғи Камолиддин Ҳикматов. 

Ш.Суяров, Ф.Тошматов,(сурат) ЎзА.