Электрон сигареталардан, яъни вейплардан фойдаланиш юрак хуружи ва инсульт хавфини сезиларли даражада оширади.

BMC Public Health журналида чоп этилган тадқиқот доирасида аввалги йилларда ўтказилган 12 та илмий иш таҳлил қилинди. Юрак хуружи хавфини баҳолашда 430 мингдан ортиқ, инсульт хавфини ўрганишда эса 1 миллиондан зиёд иштирокчи маълумотлари ўрганилган.  

Натижаларга кўра, электрон сигарета истеъмол қиладиган одамларда юрак хуружи хавфи улардан фойдаланмайдиганларга нисбатан 53 фоизга юқори. Айниқса, оддий сигарет чекишни ташлаб, вейпга ўтганларда хавф янада кучли экани аниқланган. Аввал чекиб, кейин электрон сигаретадан фойдаланишда давом этган собиқ чекувчиларда инсультга чалиниш эҳтимоли умуман чекмаганларга қараганда 73 фоизга юқори бўлган.  

Олимлар ушбу натижалар электрон сигареталарни зарарсиз муқобил деб қабул қилиш нотўғри эканини кўрсатишини таъкидламоқда. Мутахассислар вейп суюқликлари қиздирилганда юрак-қон томир тизимига салбий таъсир кўрсатадиган кимёвий бирикмалар ҳосил бўлиши мумкинлигидан ҳам огоҳлантирмоқда. 

<iframe width="560" height="315" src="https://www.youtube.com/embed/YxOHri2hXUE?si=Tjt4MnpRJZblKua9" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Мадинабону Насриева, Анвархўжа Аҳмедов, ЎзА