Хошимин қаласының соты 67 жастағы вьетнамдық кәсіпкер Труонг Ми Ланды елдегі ең ірі банктердің бірін 11 жыл бойы тонағаны үшін өлім жазасына кесті.

«Van Thinh Phat Group» конгломератының басшысы Труонг Ми Лан Вьетнамда қаржылық қылмысы үшін өлім жазасына кесілген санаулы әйелдердің бірі. 

Алаяқтықтың ауқымы бұрын-соңды болмаған деп табылған. Труонг Ми Лан Сайгон коммерциялық банкінен жалған өтінімдер арқылы 304 триллион донг (шамамен 12,5 миллиард доллар) несие алғаны үшін кінәлі деп танылды.

Бірақ оның әрекетінен келтірілген жалпы шығын 27 миллиард долларға бағаланып отыр.

Кейбір көзқарастарға сәйкес, сот қысым көрсету және ұрланған қаражаттың бір бөлігін қайтару үшін Труонгты өлім жазасына кескен.

Труонг Ми Лан кінәсін мойындамай, қарамағындағыларды кінәлаған.

Вьетнам басылымдарының мәліметінше, бұл процеске 2700 адам куәлік етуге шақырылып, іске 10 мемлекеттік айыптаушы мен 200-ге жуық адвокат қатысқан.

Айғақты заттар жалпы салмағы 6 тонна болатын 104 жәшікке салынған. Труонг Ми Ланмен бірге Вьетнам Орталық банкінің бұрынғы қызметкерлері, үкімет қызметкерлері мен SCB басшыларын қоса алғанда, тағы 85 адам сотталған және үкім шығаруды күтуде. Хошиминдегі сот отырысына 78 айыпталушы қатысған, қалғандарына іздеу жарияланған.