Пиллачилик соҳасини ўрганиш мақсадида юртимизда бўлиб турган Вьетнам делегацияси Ипакчилик ва жун саноатини ривожлантириш қўмитаси раиси Баҳром Шарипов бошчилигида Қашқадарё вилоятининг Шаҳрисабз туманидаги пиллакорлар томонидан етиштирилган ипак маҳсулотлари билан танишди. Шунингдек, пилла хомашёсини қайта ишлашга ихтисослашган “Shahrisabz SIlk Production” корхонасининг фаолиятини ўрганди.

Танишув давомида ҳар иккала томон соҳа юзасидан ўзаро фикр алмашди. Шунингдек, делегация аъзолари Қашқадарё вилоятидан сўнг Сурхондарё вилоятидаги пиллачилик кластерлари фаолиятини кўздан кечирди. Жумладан, Термиз шаҳрида жойлашган “Surxon ipagi“ пиллачилик кластерида вилоят ҳокими Улуғбек Қосимов билан учрашув бўлиб ўтди. Шундан сўнг, вьетнамлик ҳамкорларга “Surxon ipagi“ корхонаси томонидан ишлаб чиқарилган ипак маҳсулотлари кўргазмаси намойиш этилди.  

Корхонанинг ишлаб чиқариш линиялари, унинг салоҳияти ҳақида маълумот алмашилди. Келажакда ҳамкорликда қўшма лойиҳаларни амалга ошириш ҳамда ипак маҳсулотларини Вьетнам давлатига экспорт қилиш юзасидан келишиб олинди.  

Учрашув якунида меҳмонларга вилоят ҳокимининг эсдалик совғалари топширилди.  

Гулноза Бобоева, ЎзА