Таъкидлаш керак, Ветеринария ва чорвачиликни ривожлантириш давлат қўмитаси ҳузуридаги Республика ҳайвонлар касалликлари ташхиси ва озиқ-овқат маҳсулотлари хавфсизлиги давлат маркази ўтган йили Германия Федератив Республикаси ва Буюк Британиянинг энг сўнгги замонавий ПЗР ускуналари билан таъминланган.

Натижада марказнинг жойлардаги филиаллари томонидан деҳқон бозорларидаги ўсимлик ва полиз экинлари, тузлама ва салат, дон ва дон маҳсулотлари, қуруқ меваларнинг ҳам кунлик назорати олиб борилиши билан бирга бир неча турдаги озиқ-овқат маҳсулотларининг мунтазам ветеринария, санитария экспертиза кўриги ташкиллаштирилган эди.

Шунингдек, марказ томонидан ҳайвон касалликларини тезкор усулларда аниқлаш, иммун ферментли анализ, полимераз занжирли реакциялар, шунингдек, инсон организми учун хатарли микроорганизмлар, кимёвий токсинлар, тупроқдаги пестицид ва кимёвий моддаларнинг қолдиқ миқдорини ўрганиш бўйича қатор дастурлар амалиётга жорий этилган.

Замонавий биочипли анализатор ускунаси орқали гўшт ва гўшт, сут ва сут маҳсулотлари таркибидаги пестицид ва антибиотик қолдиқларини тезкор усулларда текшириш йўлга қўйилди. Озиқ-овқат маҳсулотлари таркибидаги оғир металл, заҳарли токсинлар тез фурсатда аниқланмоқда. Қишлоқ хўжалик маҳсулотларининг радиологик текширувлари бошланган.

Эслатиб ўтамиз, мамлакатимизда коронавирус пандемиясини бартараф этишда қатор ташкилотлар бирдамликда, бир жамоа бўлиб ҳаракат қилмоқда.